«Мин летчик буолуом, мин баҕам туолуо» диэн ыра санаалаах элбэх уол оҕо улааппыт буолуохтаах. Сахабыт сиригэр кыырай халлаан киэҥ туонатыгар мохсоҕоллуу көтөн куйаарар летчик идэтин баһылаан, авиация эйгэтигэр үтүө кылааттарын киллэрсибит дьоммут чахчыта да үгүстэр.
Бүгүн Россияҕа гражданскай авиация күнүн көрсө улууспут аэропордун историятыгар үтүө кылаатын киллэрсибит Александр Заболоцкайы кытта кэпсэтиибитин билиһиннэрэбит.
Александр Михайлович Горнай улууһун кытта аан бастакы билсиһиитэ народнай поэт Семен Данилов хоһоонноруттан ситимнэммит. Оҕо сылдьан Сахабыт маанылаах сирдэрин үөһээ кыырай халлаантан көрө сөҕөр баҕа санаалааҕын билинэр. Онон бу летчик идэтин таларыгар, поэт кынаттаах тыллара бигэ тирэх буолбута саарбахтаммат.
Дэлэҕэ 1977 сыл. Краснокурскай летнай училищены бүтэрэн, Герой куорат Волгоград үрдүнэн көтөн иһэн, Семен Данилов «Гордость моя» хоһоонун сөмөлүөккэ доргуччу аахтаҕа, киэҥ суоллаах-иистээх үлэтин суола тэлэччи арылыннаҕа.
Бу сылтан саҕалаан, Маган, Өлүөхүмэ, Сангаар, Сахабыт сирин, дойдубут араас регионнарын хабан айанныыр.
— Александр Михайлович, Горнайга үлэлээбит кэмнэргин ахтан-санаан ааһыахха
— Горнайга үлэлээбит сылларбын олус күндүтүк саныыбын. Оччолорго Бэрдьигэстээх аэропорда ньиргиччи үлэлиир этэ. Дитспетчердэр үлэлэрин лоп курдук чуолкайдык оҥороллоро. Үксүн сайынын күүскэ үлэлиирбит. Ойуур баһаардарын көрө-истэ элбэхтик айанныыр этибит. Ону таһынан А2-нан үс нэһилиэккэ Атамайга, Маҥаныга, Маалтааныга көтөрбүт. Дьону, почтаны таһарбыт. Сииттэнэн үчүгэй да сирдэри көрөн ааһааччыбын.
-Дьиэ кэргэниҥ, бэйэҥ тускунан сиһилии сырдатан ылыаҥ дуо? Билигин тугунан дьарыктанаҕыный?
— Мин Уус Алдан оройуонугар Бороҕон нэһилиэгэр элбэх оҕолоох дьиэ кэргэҥҥэ алтыс оҕонон төрөөбүтүм. Оччотооҕу кэм оҕолорун курдук үлэҕэ уһуйуллан-такайыллан улааппыппыт. Оскуолабын бүтэрээт баҕалаах үөрэхпэр летнай училищнеҕа тутатына киирбитим. Элбэхтик кинигэ ааҕар этим.» В бой идут одни старики» киинэни сөбүлээн көрөрүм. Бу киинэни билигин да көрөбүн. Летнайга киирэргэ эт-хаан өттүнэн бэлэм, бигэ туруктаах буолуохтааххын. Летчик бэрээдэктээх, грамотнай буолара ирдэнэр. Авиалиния эйгэтигэр олоҕум 16-та сылын анаатым.
Кэргэним Ольга Дмитриевна Бэрдьигэстээххэ төрөөбүтэ. Аҕата Дмитрий Гаврильевич, оччолорго Горнай прокуратуратыгар үс сыл үлэлии сылдьыбыт. Оччолорго прокурордары үстүү сыл аныыллар эбит. Онон атын улууска ананан барбыттар. Биһиги халыҥ дьиэ кэргэммит, элбэх сиэннээхпит. Кэргэмминээн А.Е.Кулаковскай-Өксөкүлээх Өлөксөй аатынан норуоттар доҕордоһууларын дьиэтигэр «Көмүс үҥкүү» ансаамбылга дьарыктанабыт.
Александр Заболоцкай бу кэмнэргэ куоракка «Чэбдик» санаторийга Горнайдары кытта билсибитин, тэҥҥэ дуоһуйа кэпсэппитин, сынньаммытын үөрэн туран сырдатта.
Саха сирин авиациятыгар үлэлээбит дьоннору кэпсиир кинигэни Бэрдьигэстээх оскуолатыгар бэлэх уунар санаалааҕын эттэ. Быйыл Саха сиригэр гражданскай авиация төрүттэммитэ 100 сылын бэлиэтиир.
Тыйыс тымныылаах, уларыйа сылдьар салгыннаах Сахабыт сиринэн, киэҥ дойдуларынан кыырайа көтөр сөмөлүөтү баһылыан баҕалаах оҕолорго сүбэтин-аматын биэрэр санаалаах.
Нина Сутакова