Аны сайын Саха сиригэр ыытыллыахтаах “Азия оҕолоро” норуоттар икки ардыларынааҕы VIII оонньууга бэлэмнэнии үлэтэ күннэтэ барар. Спортсменнар дойдуларын аатын чиэстээхтик көмүскүүр туһугар бэлэмнэнии түбүгэр сылдьаллар
“Скалолазание” көрүҥэ “Азия оҕолоро” оонньууларыгар бу сылга бастакы сүрэхтэнитин ааһыа. Онно анаан “Дохсуҥҥа” бары ирдэбилгэ эппиэттиир “скалодром” туруоҕа.
Бу күннэргэ спорт ити көрүҥэр сылдьар оҕолор Дьокуускайга икки нэдиэлэлээх сүүмэрдиир дьарыгы бардылар. Биһиги улуустан Василий Яковлев тренердээх Александр Агеев аатынан спортивнай оскуола иитиллээччилэрэ Дамир Алексеев уонна Тимур Егоров бэлэмнэнии түмүгүнэн, Дамир өрөспүүбүлүкэ бастакы, Тимур иккис хамаандаларыгар киирэр буоллулар. Оҕолорбут саҥа көрүҥҥэ бэйэлэрин көрдөрүөхтэрэ диэн эрэнэбит.
Вячеслав Алексеев