Бэрдьигэстээххэ Афанасий Парфенов аатынан спорткомплекска улуустааҕы комплекснай спартакиада чэрчитинэн остуол тенниһэ буолла.
Бэрдьигэстээхтэн,Одунуттан,Октябрьскайтан, Мытаахтан, Солоҕонтон, Кировскайтан 24 спортсмен бастыҥ аатын былдьаста.
Спартакиада түмүктэнэн эрэр буолан, хамаандалар инники күөҥҥэ тахсар иһин сытыы киирсиилэри көрдөрдүлэр.
Эр дьоҥҥо, кэрэ аҥардарга эдэр ыччаттар бэйэлэрин күүстэрин холоммуттара кэрэхсэбиллээх. Улууска спорт бу көрүҥүн көҕүлээччи, спорт бэтэрээнэ Одунуттан Мария Кудаисова, Октябрьскайтан Константин Потапов оҕолорун, аймахтарын көҕүлээн мэлдьи илдьэ сылдьаллара, дьиэ кэргэнинээн остуол тенниһин өрө туталлара көстөр.
Түмүккэ, I миэстэни Анджелина Павлова, II Антонина Максимова (одунулар), III Наталья Иванова (Бэрдьигэстээх) ылла.
I миэстэҕэ Мичил Максимов (Одуну), II Данил Потапов (Октябрьскай) III Валентин Петров (Бэрдьигэстээх) таҕыста.
Хамаанданан түмүккэ, I миэстэ Одуну, II Бэрдьигэстээх, III Октябрьскай буолла.
Вячеслав Алексеев