Киһи барахсан олоҕо-дьаһаҕа, үлэтэ-хамнаһа доруобуйатыттан тутулуктаах. Махтал тылы этиллиэҕи баҕарабыт үрүҥ халааттаах эмчиттэргэ.
Оннук бэйэтин идэтин баһылаан, ситиһиилээхтик, таһаарыылаахтык Бэрдьигэстээххэ олорор, үлэлиир зубной техник Архип Андреев. Кини Бэрдьигэстээх орто оскуолатын ситиһиилээхтик бүтэрэн, 2010 с. куоракка медицинскэй коллеждка зубной техник идэтин үөрэҕэр туттарсан киирэн, 2013 с. бүтэрбитэ. Төрөөбүт дойдутугар кэлэн күн бүгүҥҥэ диэри идэтинэн ситиһиилээхтик үлэлии сылдьар.
Бары да тиис абытайдаах ыарыытын тулуйа сатаан баран, төһө да тиис ылларартан куттанар санаа баарын иһин, стоматолог бырааска баран ылларан, харахтан сыыһы ылларбыт тэҥэ буоламмыт, үөрүү-көтүү үктэллээх тахсарбыт. Ылыллыбыт тиис киһи сирэйин моһуомун уларытара биллэр, ону тэҥэ аһыырга да табыгаһа суох түгэн үөскүүр.
Тиис оҥоруутугар эмиэ айымньылаах үлэ ирдэнэр, киһиэхэ бэйэтин эйгэтигэр сөп түбэһэр гына сиэдэрэй оҥоһугу ирдиир үлэтэ буолар.
Төһө да тэйиччи олордорбут, сибээс көмөтүнэн, тиис оҥоттороору уочаракка суруттаран, кэмигэр тиийэн, Архип Архиповичка алыптаах илиитин эйгэтигэр киирэн, бэйэҕэр барсар гына нэмиэт гипса оҥорон, барытын тэҥнээн көрөн-истэн, чочуйан бүтэрэн, оҥотторбут лэчигэрэспит тиис протеһын көрүнэн сүргэ көтөҕүллэн, үөрэн, ураты дьоҕурдааҕар, талааныгар махталлаах тахсарбыт.
Талаан, дьоҕур, сатабыл – айылҕаттан бэриллэр. Үгүс бар дьон хайҕабылын, махталын ылыан ылар. Өссө да үлүскэн үлэҕинэн, мааны майгыгынан, үтүө санааҕынан дьон-сэргэ убаастабылын ылаҕын. Баҕарабыт саҥаттан саҥа ситиһиини, ылыммыт сыалын ыпсан истин, самныбат санаалаах буоларгар, кэскиллээҕи кэҥэтэргэр!
Валентина Яковлева. Атамай.