Саҥа XXI үйэ үктэниитигэр 2001 с. Горнай улууһун дьонун-сэргэтин, ыччаттарын кэпсиир киэҥ суоллаах-иистээх «Чыпчаал» кинигэни сэгэтэн ылыаҕыҥ. Манна “Профессиональнай музыкант буолан, Сахатын сирин, улууһун аар саарга ааттаттын!” кэс тыллардаах ”Москва студена” диэн ыстатыйа баар. Улууспут ыччата, Бэрдьигэстээх орто оскуолатын иһигэр Николай Саввинов уһуйар ырыа куруһуогуттан куорсун анньыммыт, Москваҕа Гнессиннэр ааттарынан Музыка Академиятын устудьуона Владимир Филиппов туһунан сырдатыллыбыт.
Улууспут историятын чаҕылхай сулуһа оччотооҕу Москва студена билигин тугу үлэлии-хамсыы, айа-тута сылдьарын билсээри сибээскэ тахса сырыттыбыт.
Владимир Филиппов Бэс Күөлүттэн силис тардыылаах, биир дойдулааҕым. Оҕо сылдьан эбэлээх, эһэтин тиэргэннэрин иһинэн киирэн ааһар ыллыктаах этибит. Нэһилиэк дьоно бары да ааһар сирдэрэ этэ. Филипповтар наһаа эйэҕэстэрэ, туорайдаспакка хата төттөрүтүн «кэпсэтэн ааһыҥ, туох сонуннааххыт» дии көрсөөччүлэр. Эбэтэ Варвара Гурьевна нэһилиэкпит Бочуоттаах олохтооҕо, тарбаҕар талааннаах иистэнньэҥ, наһаа үтүө майгылаах 93 хаарын санныгар сүгэн олорор ытык кырдьаҕаспыт буолар. Дьэ ити курдук, араас өҥнөөх сибэккилэринэн симэммит оҕо сааспытын санатар, алгыстаах тиэргэнтэн ситимнэнэн, ирэ-хоро кэпсэтиигэ киирдибит.
– Владимир кэрэ эйгэҕэ хайдах кэлбиккиний?
– Мин бэйэбин өйдүөхпүттэн ырыаны олус сөбүлээн истэбин. Семен Данилов атынан Бэрдьигэстээх орто оскуолатыгар маҥнайгы кылааска үөрэнэ киирэн баран, ырыа куруһуогар сылдьыбытым. Биэс сыл ыллыырга, музыканы таба истэргэ куруһуок салайааччытыгар Николай Саввиновка уһуйуллубут дьоллоохпун. Онтон алын кылааһы бүтэрэн баран, В.А.Босиков аатынан Музыка Үрдүкү оскуолатыгар куоҥкуруһунан үөрэнэ киирбитим. Онон Сахабыт сиригэр музыка үрдүкү оскуолатын бастакы хараҥаччыларыттан биирдэстэрэ буолабын. Үөрэнэр, устудьуоннуур кэмнэрбэр Норуоттар икки ардыларынааҕы үрдүк таһымнаах куоҥкурустарга кыттан дипломант, лауреат аатын ылаттаабытым.
– Горнайтан аан бастакы Гнесиннэр ааттарынан Музыка Россиятааҕы Академиятыгар киирбит устудьуон буолаҕын. Дойдубут тэбэр сүрэҕэр Москваҕа үөрэммит, үлэлээбит кэмнэргин истиэххэ.
– Москваҕа Саха сириттэн Музыка Үрдүкү оскуолатын выпусниктара үс буолан киирбиппит. Сорохторбут Санкт-Петербурга туттарсан киирбиттэрэ.Үөрэнэр кэмнэрим умнуллубаттык, олус интэриэһинэйдик ааспыттара. Тромбонист идэтин баһылаабытым. Музыканнар эмиэ медиктар курдук олохпут улахан аҥаарын үөрэнэбит. Киһи дьаныһан, умсугуйан туран үөрэтэр, үөрэнэр идэтэ буолар. Классическай музыка эйгэтэ олус киэҥ, түгэҕэ көстүбэт байҕал кэриэтэ дириҥ.
Үөрэхпин бүтэрэн баран, биэс сыл Москва консерваториятыгар, улахан театрдарга уонна байыаннай оркестрга биэс сыл үлэлии сылдьыбытым.
Олус элбэх биллиилээх классическай ырыаһыттары, музыканнары кытта алтыспытым. Москваҕа доҕотторум элбэхтэр, билигин да билсэ-көрсө олоробут.
– Бу идэҕинэн хас сыл үлэлээтиҥ?
– Онтон кэлэн баран, Дьокуускайга Галина Кривошапко аатынан СӨ Судаарыстыбаннай филармониятын концертмейстер бөлөҕүгэр тромбониһынан сүүрбэһис сылбын айымньылаахтык үлэлиибин.
Күн-дьыл ааьара түргэнин. Хаьыакка интервью биэрэрбэр 18-с саастаах саҥа үөрэххэ киирбит сылым этэ. Каникулбар кэлэ сылдьар кэммэр 2001с.СГУ журналистикаҕа салаатын устудьуона Александр Максимов ылбыта.
– Владимир дьиэ кэргэҥҥин, тугунан дьарыктанаргын сырдатан ылыаҥ дуо?
– Мин ыалбын, Дьокуускайга олоробут. Икки оҕолоохпут. Оҕолорбут «Айыы кыһатын» оскуолатыгар ситиһиилэхтик үөрэнэллэр. Иллэҥ кэммин дьиэ кэргэммэр аныыбын. Бары бииргэ Сахабыт сирин, араас сирдэрин көрөрбүтүн, айылҕаҕа сылдьарбытын сөбүлүүбүт.
– Норуот кутун-сүрүн туппут ураты тыыннаах «Норд Саунд» бөлөх төрүттээччитэ буолаҕын.
– Оннук. 2006 с.үөрэхпин бүтэрэр сылбар тэрийбитим. Ол инниттэн 1999 с. оскуолаҕа үөрэнэ сылдьан, ыллыыр этибит. Быйыл бөлөхпүт 25 -с сылын туолар, бэлиэтиэхпит диэн былаанныыбыт.
– Музыкант буолар оҕолорго тугу сүбэлиэҥ этэй?
Бастатан туран, баҕа санаа наада. Ыһыктынан кэбиспэккэ, сахалыы эттэххэ, ньоҕойдоһон туран үөрэнэриҥ ирдэнэр. Бу идэҕэ начаас табыллыаҕа диэн санаа ырааҕынан сылдьар. Онон саамай сүрүнэ ис сүрэхтэн ылынан, ылсан туран үөрэннэххэ олус умсугутуулаах идэни баһылыаххыт. Музыка нарын иэйиитинэн олоххутун симиэххит.
Мин бастатан туран, бу сөбүлүүр идэбин баһылыырбар күүс-көмө өйөбүл буолбут тапталлаах төрөппүттэрбэр, бырааппар, эбэлээх, эһэбэр уонна чугас аймах-билэ дьоммор муҥура суох махтана саныыбын. Кинилэр истиҥ сыһыаннара, улахан эрэллэрэ күүһү-уоҕу киллэрбитэ диэн сыаналыыбын. Билигин бэйэм ыал дурда-хахха аҕата буолан олорон, оҕо сааһым күндү чөмчүүк утаҕын, дьиэ кэргэммэр угуттуурбунан киэн туттабын.
Владимир истиҥ кэпсэтиигэр махтанабын. Үөһээ халлааҥҥа көҥүл көтө-дайа, дьырылыы туойар күөрэгэй чыычаах курдук, устар олоҕуҥ кэрэнэн симэнэ, киэркэйэ, тупса, туругура турарыгар баҕарабын. Галина Кривошапко аатынан СӨ Судаарыстыбаннай филармониятын улахан оркестрын чаҕылхай тыаһын-ууһун таһаарар тромбониһа, уһулуччу талааннаах музыкана, СӨ култууратын туйгуна Владимир Викторович Филипповтыын сэһэргэһиибит салҕаныа диэн эрэллээхпин.
Нина Сутакова