Горнайга улуус сайдыытыгар туһуламмыт баараҕай тутуулар тохтообокко бара тураллар. Биир оннук бырайыагынан Бэс Күөлүгэр саҥа оскуола уонна элбэх хайысхалаах киин буолаллар. Икки улахан объект быйыл үлэҕэ киириэхтээх. Онон үлэ тэтимнээхтик барар турар.
Айсен Павлов, нэһилиэк баһылыга:
– Биһиги маннык улахан тутуулар биир кэмҥэ бара туралларыттан олуһун үөрэ сылдьабыт. Бу боппуруоһу олохтоохтор туруорсубуттара ыраатта. Онон объектар кэмигэр түмүктэнэллэрин долгуйа күүтэбит. Нэһилиэнньэ бары үлэҕэ көхтөөх. Туох наада буолла да, тутатына көмөлөһөллөр.
Роман Чечебутов, “СТК” ХЭТ прораба:
– Элбэх хайысхалаах киин көҥдөйүн тутуута бара турар. Бастакы этээс үөһээ өттүн ууруохпут. Матырыйаалынан кэмигэр хааччыйаллар. Икки биригээдэҕэ 26 киһи баар. Ону таһынан, экскаватор, кыраан, погрузчик тиэхиньикэлэр үлэлииллэр.
Кажимжон Эминжонов, оскуола тутуутун биригээдьиирэ:
– Объекпыт истиэнэтин таһаара сылдьабыт. Салгыы ис хосторун үлэтин оҥоруохпут. Ол кэннэ, штукатурка, ситэрии үлэтин оҥоруохтаахпыт. Икки биригээдэҕэ 50-ча киһи баар. Үлэ бэркэ баран иһэр. Оскуола матырыйаала күн ахсын кэлэ турар. Бу тутуу барарыгар саҥа кран, погрузчик, мэһийэр улахан тиэхиньикэ ылыллыбыт. Септик үлэтэ түмүктэнэн, тас өттүнээҥҥи благоустройстваны, сирин-уотун көннөрөн оҥоруу ыытылла турар.
Үлэ күүскэ ыытылла турарыттан киһи санаата көтөҕүллэр. Тутааччылар объектары түргэнник эрэ буолбакка, хаачыстыбалаах тутуулары нэһилиэнньэҕэ бэлэхтиир, кыһамньылаах үлэни ыыталлара хайҕаллаах.
Вячеслав Алексеев