Афанасий Ноев СӨ Култуураҕа уонна духуобунай сайдыы миниистиринэн ананна. Дьиикимдэттэн тыа сирин култууратын дьиэтин дириэктэрэ Анастасия Мордовская санаатын үллэстэр.
– Афанасий Ноев Култуура уонна духуобунай сайдыы миниистиринэн анаммытын сэргии иһиттим. Миниистиринэн анаммытынан эҕэрдэбитин тириэрдэбит. Култуура миниистирин солбуйааччытынан үлэлиир кэмиттэн бииргэ үлэлэһэбит.
Биһиги култуурабыт дьиэтэ 2019 с. «Култуура» национальнай бырайыагын чэрчитинэн тутуллан дьэндэйбитэ. Култуура дьиэтин иһигэр музей-галереята айымньылаахтык үлэлиир. Биһиги өрөспүүбүлүкэбитигэр, Горнай улууһугар кэлбит ыалдьыттар бары Мытаахтааҕы музей-галереяҕа ССРС народнай худуоһунньуга Афанасий Осипов хартыыналарын, саха народнай поэта Семен Данилов, саха народнай суруйааччыта Софрон Данилов экспонаттарын, библиотекаларын сэргии көрөллөр. Омук дойдуларыттан кэлэр туристар биһиги сирбитин-уоппутун, музейбытын сэҥээрэллэр.
Ону тэҥэ ааспыт сылга Кырсаада Синема саала арыллан, дьон-сэргэ сынньанарыгар, киинэ көрөрүгэр усулуобуйа тэриллибитэ.
Инникитин да киэн туттар биир дойдулаахтарбыт ааттарын үйэтитиигэ бииргэ үлэлэһиэхпит. Афанасий Ноев култуура сайдыытыгар, материальнай-техническэй бааза тупсуутугар, киинэ сайдыытыгар үлэлэһиэ диэн бүк эрэллээхпит.
Интэриниэт ситимиттэн хаартыска туһанылынна.