Олунньу 20 күнүгэр бастакынан Одунулар улуус бэтэрээннэрин сэбиэтин икки ардыларыгар Улуу Кыайыы 80 сылын көрсө «Түргэн куб» В.П.Емельянов авторскай спортивнай оонньуутун тэрээһиннээхтик ыыттыбыт. Манна суолта ууран, бэлэмнэнэн Маалтааны, Атамай, Октябрьскай, Кировскай, Солоҕон, Одуну нэһилиэктэриттэн үс көлүөнэ дьиэ кэргэттэрэ күөн көрүстүлэр, илин-кэлин түһүстүлэр.
Бу күрэх биир ирдэбилэ-биир дьиэ кэргэн ( оҕо, аҕа, эһэ) Аҕа дойду Улуу сэриитигэр кыттыбыт буойун сыдьааннара буолуохтаах, итиэннэ 5-7 мүн устата «Өйдүүбүт, сүгүрүйэбит, махтанабыт» тиэмэҕэ презентация оҥоруохтаах.
Хас биирдии нэһилиэк дириҥ ис хоһоонноох бэлэмнээбит матырыйаалын долгуйа, киэн тутта иһиттибит. Үс бастыҥ сырдатыы ирдэбили тутуһан хайҕанна Одунуттан Никифоровтар, Атамайтан Семеновтар, Маалтааныттан Филипповтар, кинилэргэ 2-лии тыһ.сертификат туттарылынна.
Күн иккис аҥаарыгар 4×4 размердаах хонууга 50 устуука куубугу бириэмэҕэ хомуйуу «Түргэн куб» көрөөччү болҕомтотун ылла.
Бастыҥ көрдөрүүлээх Арина, Арсен, Афанасий Афанасьевич Кубаровтар (Кировскай) бастакы миэстэни ылан, анал кубогынан, мэтээлинэн, сыаналаах бирииһинэн наҕараадаланнылар. Иккискэ Влада,Сергей Филипповтар эһээлэрэ Николай Николаевич (Маалтааны), үһүскэ Изольда, Геннадий, Султан Сапаргалиевич (Одуну) таҕыстылар үөрүү өрөгөйүн биллилэр.
Күрэхтэһиигэ ыҥырыылаах ыалдьыттар «Түргэн куб» оонньуу төрүттээччитэ, автор Владимир Петрович Емельянов кэргэнинээн Изабелла Михайловналыын, Светлана “Егоровна Захарова кыттыыны ылбыттара тэрээһин тэтимин күүһүрдэн, суолталаан биэрдэ. Улууспут «Ытык сүбэ» салайааччыта Марина Андреева үтүө холобур буолан тэҥҥэ сылдьыста, баҕа санаатын ыччакка тириэртэ.
Түгэнинэн туһанан бииргэ буолбут тыа сирин түөлбэтин баһылыгар Владимир Текеянов, баһылык солбуйааччытыгар Василий Кривошапкиҥҥа, Л.Н.Харитонов аатынан Маҕарас орто оскуолатын дириэктэригэр Максим Максимовка, “Туллукчаана” оҕо уһуйаанын сэбиэдиссэйигэр Айтал Никаноровка, ОДьКХ Маҕарастааҕы учаастагын маастарыгар Петр Павловка, Сынньалаҥ киин дириэктэригэр Вера Даниловаҕа бэтэрээн сэбиэтин аатыттан дириҥ махталбытын биллэрэбит.
Бу курдук тэрээһиннэргэ улууспут дьоно-сэргэтэ көхтөөх буолуоҕуҥ диэн үтүө санаанан тарҕастыбыт.
Бэтэрээн сэбиэтэ, Одуну