Олунньу бүтэһик күннэригэр Одуну нэһилиэгин баһылыга Владимир Текеянов, солбуйааччы Василий Кривошапкин, Маалтааны нэһилиэгин баһылыга Дмитрий Борисов, Солоҕон нэһилиэгин дьаһалтатын сүрүннүүр исписэлииһэ Станислав Васильев састааптаах Горнай улууһун делегацията СВО-ҕа Ийэ дойдубут көмүскэлигэр сылдьар уолаттарбытын көрсөр, билсэр, биир дойдулаахтара, дьонноро-сэргэлэрэ ыыппыт кэһиилэрин тус бэйэлэригэр тиксэрэр соруктаах айаҥҥа туруммуттара.
Кинилэр бу күннэргэ ДНР Новоазовск куоратыттан айанаан, Волновахскай уонна Володарскай оройуон диэки сулууспалыыр саллааттары көрсөн, бэлэмнэниллибит бородууктаны байыаннай таҥаһы-сабы, харысхаллары, оҕолор саллаакка суруктарын, дьонноро-сэргэлэрэ ыыппыт посылкаларын түҥэттилэр.
Запорожскай уобалас оройуоннарын кэрийэн, уолаттарбытын көрсөн, истиҥник кэпсэтэн, сонуннарын үллэһиннилэр. Хорсун уолаттарбыт бары этэҥҥэлэр, доруобуйаларын туруга үчүгэй. Үөрдүлэр-көттүлэр, махтаналлар, эҕэрдэлэрин тириэрдэллэр. Улуус делегацията салгыы Луганскай, Белгородскай, Курскай уобаластарынан сылдьыахтара.
Вячеслав Алексеев