Бүгүн улуус депутаттарын Сэбиэтин VII ыҥырыылаах сүбэ мунньахтара ыытылынна. Бу күн нэһилиэнньэ итэҕэлин ылан, төрөөбүт дойдубут сайдыытын түстэһиэхтээх дьоҥҥо мандаттарын туттардылар.
Тэрээһиҥҥэ баһылык Никита Андреев саҥа талыллыбыт депутаттарга бэйэтин эҕэрдэтин тириэрдэн туран, улуус устаабыгар олоҕуран, нэһилиэнньэ туруорсар боппуруостарын көрөннөр, өйөөннөр, уопсай сүбэни ылынан, тахсыылаахтык үлэлииллэригэр ыҥырда.
Ытык Сүбэ салайааччыта Марина Андреева, прокурор Михаил Кардашевскай, араас сылларга улуус депутаттарын Сэбиэтин үтүө суобастаахтык салайбыт бэрэссэдээтэллэр Алквиад Тарасов, Юрий Пахомов, Айал Ноговицын үтүө тылларга кыттыһан туран, ситиһиилэри баҕардылар.
Бу күн депутаттар куоластааһыннарын түмүгүнэн, улуус депутаттарын Сэбиэтин саҥа бэрэссэдээтэлинэн, Горнай сайдыытыгар үгүс кылаатын киллэрбит Маргарита Константинованы, солбуйааччынан Петр Андреевы биир санаанан таллылар.
Нина Сутакова