От ыйын 11 күнүгэр улуус дьаһалтатыгар инвестпрограмманан уонна туризм эйгэтигэр үлэлиир, саҥа саҕалыыр урбаанньыттар бырайыактарын өйөөһүҥҥэ 6 мөлүйүөн кэриҥэ субсидия көрүү комиссията ыытылынна.
Комиссия сыллата урбаанньыттар бырайыактара тупсан, сайдан иһэрин бэлиэтээтилэр. Ону таһынан, саҥа саҕалыыр урбаанньыттар эбиллибиттэрэ эмиэ хайҕаллаах.
Холобур, Кировскайтан Леонтьевтар диэн эдэр ыал Чэкээ чугаһынан, карьер аттыгар «Уһук Илин гектарынан» сир ылан саҥа туристическай база туттар былааннаахтарын кэпсээтилэр. Онтон инникиттэн үлэлии турар, «Маатта», «Шишки», “MiniZoo” эбийиэктэр саҥа соруктары туруорунан, өссө кэҥиир, сылы мэлдьи үлэлиири тобула сатыыллара хайҕаллаах.
Удьурҕайынан дьарыктанар, СӨ уус-уран оҥоһуктарын маастара Валерий Дьячковскай тиэргэнин аттыгар балаҕан туттан, ыалдьыттары көрсөргө, оҕолорго маастар-кылаас ыытарга былааннаммыта ураты, истиҥ өйдөбүллээх. Инвестиционнай бырайыктааһыҥҥа өйөбүлү улууспут уопуттаах урбаанньыттара Петр Андреев, Николай Прохоров туһанар кыахтаннылар.
Онон улууспут урбаанньыттара өйөбүл туһанан саҥа саҕахтары арыйан, сонун хайысхалары тутуһан үлэҕит өссө таһаарыылаах буоларыгар баҕарабыт. Үлэлииргэ-хамсыырга усулуобуйа тэрийэр, өйөбүл оҥорор улууспут дьаһалтатыгар махтанабыт.
Күннэй Алексеева