Бу күннэргэ улууспут баһылыга Никита Андреев, нэһилиэк баһылыктара байыаннай эпэрээссийэ буола турар сиригэр тиийэн, биир дойдулаахтартарбытын көрсө сылдьаллар.
Эрдэ улуус дьоно бука бары түмсэн, уолаттарбытыгар көмө-өйөбүл оҥорорго, туттар мал-сал ыларга «Бэйэ дьонун бырахпаппыт» диэн акцияҕа хас биирдии киһи ис санаатыттан көмөлөспүтэ.
Ону таһынан биирдиилээн уолаттар төрөппүттэрэ, аймахтара, дьиэ кэргэннэрэ посылкаларын чопчу чаастарыгар ыытар дьолломмуттара. Ийэлэрэ, кэргэттэрэ сылаас илиилэринэн посылка бэлэмнээн, бэрэски, алаадьы буһаран, дойдуларын күндү аһылыгын, убаһа тоҥ этин, собо, кыһыллар балык, таҥас-сап бэлэмнээн, улуус делегациятынан ыыппыттара. Уолаттар посылкаларын тутан, баһылыктарын илэ көрсөн, кэпсэтэн-ипсэтэн, сонун истэн, махталлара муҥура суох.
Горнайтан гуманитарнай көмөнү тутан үөрэн, астынан олоробут. Улууспут дьонугар, аймахтарбытыгар, улуус делегациятыгар көмөҕүт иһин махтанабыт.
Чааспытыгар Горнайдар түөрпүт. Биир дойдулаахтарбар барҕа махтал тиэрдиэм этэ. Ыыппыт гуманитарнай көмөҕүтүн туттубут. Чуолаан Горнай Автодорга, антидроннай пушкаҕытын туттубут, махталбытын тириэрдэбит. Түөлбэм олохтоохторугар эмиэ истиҥ махталбытын ыытабын, посылкаларгытын туттубут, сонуннары иһиттибит. Уолаттаргытыгар эрэниҥ, Кыайыы биһиги туспутугар буолуоҕа.
Бэйэбитигэр эрэллээхпит. Сахалар толлон-саллан турбаппыт. Санаабыт күүстээх. Дьоннорум долгуйумаҥ. Этэҥҥэ эргиллэн кэлиэҕим.
Уруй-айхал буоллун Горнай улууһун олохтоохторугар. Баһылыкпыт кэлэн, посылкаларбытын тиксэртээтэ. Кэлэн иһэр Саргылаах Саҥа дьылынан улууспут олохтоохторун ыалдьыттарын, чуолаан киин балыыһа үлэһиттэригэр эҕэрдэ ыытабын.
Уустук кэмҥэ уолаттарбытын өйүүргэ улуус салалтата маннык хамсааһыны кэмигэр оҥорбута махталлаах уонна наадалаах. Уолаттарбыт бары этэҥҥэ сылдьыҥ, харысхаллаах буолуҥ, дьоҥҥут-сэргэҕит үтүө тыллара, алгыстара күүскүтүгэр күүс, сэниэҕитигэр сэниэ киллэрдин. Кыайыы көтөллөөх кэлэргитин бука бары күүтэбит!
Күннэй Алексеева
Хаартыскалары делегациялар түһэриилэриттэн туһанылынна