Сэтинньи 27 күнүгэр СӨ Судаарыстыбаннай (Ил Түмэн) Х пленарнай мунньаҕар «Булт уонна булт ресурсаларын харыстааһын туһунан» Саха Өрөспүүбүлүкэтин сокуонун 13 ыстатыйатыгар уларытыылары киллэрии туһунан ырытыстылар.
Сүрүн боппуруос ураты харыстанар сирдэргэ бултууру көҥүллүүр балаһыанньата буолла. Бу боппуруос хайдах көрүллүбүтүн уонна туох түмүктээх буолуохтааҕын туһунан норуот депутата Василий Николаев быһааран биэрэригэр көрдөстүм.
Бу саас ыытыллыбыт кэмитиэт мунньаҕар сокуоҥҥа уларытыы киллэрии туһунан дьүүллэһиигэ, билиҥҥитэ уларытыы киллэрии эрдэтин туһунан бэйэм санаабын эппитим.
Кэлин, сокуон ымпыгын-чымпыгын үөрэтэн баран, бу сокуоҥҥа уларытыы киирэрин сөптөөҕүнэн аахтым. Билиҥҥитэ, өрөспүүбүлүкэбит территориятын 30 %-на ураты харыстанар сирдэргэ киирэр. Маннык территорияларга олорор олохтоох дьон бу сирдэргэ бултуур көҥүллэммэт диэн өйдөбүллээхтэрэ. Дьиҥэр, ураты харыстанар сирдэргэ зонатыттан көрөн бултуур көҥүллэнэр. Ол эрэн ханнык кыылы, хайдах бултуур туһунан бэрээдэгэ олохтоммотох этэ. Маны тэҥэ ураты харыстанар сирдэргэ киирсэр территориялаах нэһилиэктэр, улуустар олохтоохторо бултуурга көҥүл ылыылара болҕомтоҕо ылыллыахтаах.
Инники, бэл биһиги, ураты харыстанар сирдээх улуустан сылдьар дьон, бу сирдэргэ булка көҥүл биэрэллэрин билбэт да этибит. Бу сокуоҥҥа уларыйыы киирдэҕинэ, ураты харыстанар сирдэргэ булт көҥүлэ дьэҥкэ буолуоҕа.
Василий Тимофеев
Иннокентий Корякин уруһуйа