Устудьуон олоҕо түргэн тэтим

Бүгүн Россияҕа Устудьуон күнэ бэлиэтэнэр. Хас биирдии киһиэхэ устудьуон сыллара хатыламмат, кэрэ түгэннэри, эрэллээх доҕоттору бэлэхтиир. Устудьуон мэлдьи үөрэх-билии, сайдыы суолунан эрэллээхтик хардыылыыр.

Биһиги «Чыпчаал» диэн улууспут устудьуоннарын түмсүүтүн салайар Константин Колесовы кытта кэпсэтиибитин сэргээн ааҕыҥ.

-Устудьуон күнүнэн итиитик-истиҥник эҕэрдэлиибит. Бэйэҥ, үөрэҕиҥ туһунан кылгастык билиһиннэрэргэр көрдөһөбүт.

— Мин аатым Константин Колесов, 2020 с. улуустааҕы гимназияны ситиһиилээхтик бүтэрбитим. Бастаан  М.К.Аммосов аатынан Хотугулуу-Илиҥҥи федеральнай университет иһинэн Инфраструктурнай технология колледжын бүтэрбитим. Үс сыл олус түргэнник элэстэнэн ааспыта. Онтон билигин ХИФУ-га үөрэхпин үрдэтинэн филологическай факультет «Реклама уонна уопсастыбаннаһы кытта сибээс» салаатын II кууруһун устудьуона буолабын.

— Уопсастыбаннай үлэҕэ төһө болҕомтоҕун уураҕыный?

— Устудьуон олоҕо түргэн тэтим. Биир сиргэ олорон хаалбакка мэлдьи общественнай олоххо көхтөөхтүк кыттарбын ордоробун. Олоххо актыыбынай көрүүлээх киһи ситиһиилээх, кыайыылаах-хотуулаах буолар диэн девизтаахпын.

Биир Ньыгыл Россия «Эдэр Гвардия» уопсастыбаннай хамсааһын нөҥүө атын регионнары кытта бииргэ үлэлэһэбит. Бүтүн Россиятааҕы общественнай «Эдэр Гвардия» хамсааһын Саха сиринээҕи салаатын волонтердара буоламмыт Луганскай уобалас чөлүгэр түһэригэр үтүө кылааппытын киллэрбиппит. Ковид, ойуур баһаарын, ууга барыы кэмнэригэр уонна СВО-ҕа волонтер быһыытынан өрүү кыттабыт.

Ааспыт сылтан «Чыпчаал» Горнай устудьуоннарын түмсүүтүн салайааччытынан  анаммытым. Онон эппиэтинэһим өссө үрдээтэ. Бу тэтимим үөрэхпэр олох мэһэйдээбэт.  Киһи бириэмэтин сөпкө былаанныырга кыһаллыахтаах.

-«Чыпчаал» Горнай устудьуоннарын түмсүүтүн инники былаана

Биһиги түмсүүбүтүгэр 20 актыбыынай устудьуон баар. Үөрэҕи кытта уопсастыбаннай олоҕу хайдах дьүөрэлээн илдьэ сылдьыахха сөбүн сүбэлиибит.  Түмсүүбүт сүрүн хайысхатыгар оскуола үөрэнээччилэрин кытта үлэлэһии киирэр. Бу кэмнэргэ Бэрдьигэстээххэ профориентация үлэтин ыытаар былааннаахпыт.

Инникигэ бигэ эрэллээх биир дойдулаахпытыгар, эдэр ыччаппытыгар Константин Колесовка үрдүк ситиһиилэри баҕарабыт.

Нина Сутакова