Балаҕан ыйын 20 күнүгэр В.Д.Лонгинов аатынан Атамай орто оскуолатыгар үөрүүлээх быһыыга-майгыга психолого-педагогическай кылаас арылынна.
Тэрээһин үөрүүлээх чааһыгар бэтэрээн учууталларбыт Екатерина Павлова, Нина Адамова, «Радуга» уһуйаан сэбиэдиссэйэ Диана Федорова, иитээччилэр Раиса Иванова, Юлиана Аввакумова бэйэлэрин баай уопуттарын кэпсээтилэр, баҕа санааларын оҕолорго эттилэр.
Улуус үөрэҕириитин управлениетын начаалынньыга Варвара Сметанина интэриниэт нөҥүө эҕэрдэтин тириэртэ.
Саҥа кылаас группатыгар араас кылаастартан 11 оҕо учуутал идэтигэр уһуйулла киирдилэр: Юлиана Иванова, Сахайаана Саввинова, Надя Иванова, Айаана Федорова, Эвелина Васильева, Дайаана Саввинова, Галя Стручкова, Аурелия Аввакумова, Айылгылаана Ефремова, Сайаана Иванова, Сахайаана Степанова.
Үөрэнээччилэр бастакы бырайыактыыр дьарыктарыгар «Аныгы учуутал мөссүөнэ» диэн модель оҥорон көмүскээтилэр.
Учуутал идэтэ — улуу идэлэртэн биирдэстэрэ. Идэни талан холонорго санаммыт күндү үөрэнээччилэрбитигэр, кинилэр учууталларыгар Мария Сергееваҕа эҕэрдэбитин ыытабыт, үрдүк ситиһиилэри баҕарабыт.
Татьяна Павлова