Ыалдьыт өрүү үчүгэйи көрүөн баҕарар

Бэрдьигэстээхпит сылтан сыл үүнэн-сайдан, тупсан-киэркэйэн иһэрэ олус үчүгэй!

Арай тоҕо эрэ, Бэрдьигэстээххэ Мытаахтан, Солоҕонтон киирии аартык кур бэйэтэ кубулуйбат, өссө сыллата бөҕүрэн, мөлтөөн иһэрэ өйдөммөт.

Сыбаалка ирдэбилгэ олоҕуран сүөһү киирбэт, бөх таска тоҕуллубат гына олбуорданыах буолбута, уонтан тахса сыл ааста быһыылаах. Кыайтарбата сүрэ бэрт.

Ханна да бөһүөлэккэ киириини тупсарыыга, болҕомто бастакы уочарат ууруллар. Онтон бу сэлиэнньэҕэ хайдах тэринэн, хомунан олороллоро көстөр.

Бары билэрбит курдук, Мытаах, Солоҕон да ураты сирдэр. Манна Саха сирин аар-саарга аатырдыбыт алта норуодунайа төрөөбүтэ. Кэрэ сиргэ Сиинэҕэ манан бараллар, бу суолунан төннөллөр. Аҥардас Мытаах музейыгар сылга атын сиртэн 2000-тан тахса ыалдьыт кэлэр. Сиинэҕэ эмиэ хас эмэ тыһыынчанан турист ыалдьыттыыр.

Дьэ кинилэр бары биһиги сэлиэнньэбитигэр киириэх иннинэ, мөкү көстүүбүтүн көрөргө күһэллэллэр. Сатыы киһи кыратык сынньана түһэр сирбитигэр, суол кытыытыгар харыйалар сууллубуттара сыппыттарын курдук адаарыһа сыталлар. Былыргы хотоннор күрүөлэрэ, баҕаналара өссө да ситэ ыраастана иликтэр.

Онно куһаҕан сурахтаах эргэ дьиэ көтүллүбэккэ турар. Хаппыт мастар элбэхтэр. Бэтэрээ кэлэн истэххэ, сэбиэскэй саҕанааҕы былыргы баннер хайыта тардыллан баран, сууллубакка бокулуоннуу тураахтыыр. Дьиэлэр утары эргэ көтүлүбүт дьиэлэр щиттэрин аҕалан, бырахпыттара хомуллубатаҕа ыраатта, урусхал курдук көстүүнү кэпсии сытар. Саатар ол аттыгар эмиэ туох эрэ тутуу бөҕүн, буорун — сыыһын аҕалан тохпуттар.

Ханнык да суол, айаны кэпсиир бэлиэлэр суохтар. Арай «Өрт с. 80 км» диэн сэбиэскэй саҕанааҕы бэлиэни ыраах ыал олбуоругар саайбыттара, оол болоорон көстөр. Кэбис, араас омук айанныыр арҕааннаах аатырбыт аартыкпытын маннык көрбөтөҕө-билбэтэҕэ буоларбыт табыллыбат.

Көрөр, хомуйар, ыраастыыр, билиҥҥи ирдэбилгэ сөп түбэһиннэрэн саҥардар кэм кэлбэтэ дуо?

Василий Алексеев