Бүгүн Аан дойдуга хореограф күнэ бэлиэтэнэр. Онон бу ураты кэрэ күнү көрсө Мэхээлэ Дьөгүөрэп аатынан Сынньалаҥ киинин хореограба Сайаана Кычкинаны кытта истиҥ кэпсэтиибитин билиһиннэрэбит.
«Үҥкүү кэрэ эйгэтэ оҕо сааһым аргыһа буолар. Тохсус кылааска үөрэнэ сылдьан, үҥкүүһүт буолар эбиппин диэн быһаарыммытым. Ол кэмҥэ «Крор» диэн биллиилээх үҥкүү группатын астына көрөрүм. Кэбээйигэ Мукучутааҕы музыкальнай оскуолаҕа «Төлөн» диэн үҥкүү ансаамбылыгар дьарыктана сылдьан, Майкл Джексон ырыатынан үҥкүү туруорбутум. Үҥкүүгэ кумирым Майкл Джексон диэхпин сөп. Үҥкүү хайысхатын барытын ордоробун. Ол эрэн фольклору ордук интэриэһиргиибин, үөрэтэбин.
2018 с. АГИКИ култуура уонна искусство институтун хороеграфия отделениятын ситиһиилээхтик бүтэрбитим. Билигин Мэхээлэ Дьөгүөрэп аатынан Сынньалаҥ киинигэр «Эҕэрдэ» народнай кэлэктиибигэр хореограбынан айымньылаахтык үлэлээн саҕалаатым.
Бу кэрэ уонна уустук идэни баһылыан баҕалаахтарга тулууру, үчүгэй дьарыгы, куттаммакка толлубакка көхтөөхтүк талааҥҥытын арыйаргытыгар баҕарабын.
Кэрэни кэрэхсиир, сырдыгы угуттуур үҥкүүнэн дьарыгырар, дьарыктыыр идэлээх дьоммутун итиитик-истиҥник эҕэрдэлиибит.
Нина Сутакова