Бүгүн, от ыйын 1 күнүгэр — саха национальнай бэчээтэ төрүттэммит күнүгэр, «Азия оҕолорун» VIII аан дойдутааҕы оонньууларыгар аан бастаан киирбит олимпийскай көрүҥҥэ — үрдүккэ ыттыыга (скалолазание) күрэхтэһии саҕаланна.
«Дохсун» спорт киинигэр күрэхтэһии үөрүүлээх арыллыытын кэннэ, спортсменнар үрдүк истиэнэҕэ ыттыыны саҕалаатылар. Спортсменнар түргэнник ыттыыга, боулдериҥҥ бастыҥ аатын былдьаһыахтара.
Оонньуулар дирекцияларын быһаарыытынан, Арассыыйаҕа скалодромнары тутар «Top Point» диэн биир бастыҥ тэрилтэ кылгас кэмҥэ быйыл «Дохсун» спорт киинигэр 16 миэтирэ үрдүктээх истиэнэни тутта. Күрэхтэһиигэ 9 хамаанда, 22 кыргыттар уонна 25 уолаттар кытталлар.
Саха сирин хамаандатын састаабыгар киирбит 12 спортсмен өрөспүүбүлүкэ чиэһин көмүскүөхтэрэ, кыайыыга дьулуурдарын көрдөрүөхтэрэ.
Тириэньэр Василий Яковлев Саха сирин хамаандатын чилиэннэрэ икки ый дьарыктаммыттарын билиһиннэрдэ.
Вячеслав Алексеев,
Николай Куприянов