Атырдьах ыйын 30 күнүгэр Горнай улууһуттан сэттиэ буолан, айылҕабыт барахсан көмүс симэҕин симэнэн турар биир үтүөкэн кэмигэр Хаҥалас улууһун II-с Дьөппөн нэһилиэгэр айар иэйии түһүлгэтигэр уопсайа 5 чаас курдук айаннаан, Хаҥаласка тиийдибит. Күөрдэм айылҕата сылаас ардаҕынан арчылыы көрүстэ, тула өттө бэс мас тииттэрдээх бөһүөлэк ураты ыраас салгына ил гынна.
Тэрээһиммит үөрүүлээх арыллыыта Күөрдэмнээҕи Р.К.Захаров аатынан Самартай түмэлгэҕэ тэрилиннэ. Олохтоох алгысчыт Андрей Скрябин дойдутун дьонун, түһүлгэ кыттыылаахтарын, киэҥ түһүлгэни ааттаан-суоллаан алгыс этээтин кытта бэл сиксийэ турар ардахпыт астан, халлаан оройо арылынна. Үөрүүлээх чааһы нэһилиэк баһылыга Ольга Петухова арыйда, тэрээһини өйөөн, анаан-минээн кэлэн, эҕэрдэ тылларын эттилэр Ил Түмэн депутата Тихон Скрябин, СӨ тыатын хаһаайыстыбатын миниистирэ Артем Александров, ветеринария департаменын салайааччыта Андрей Архипов.
Салгыы үс түһүлгэнэн үлэ ыытылынна. Горнайтан кэлбит делегация кыттыылаахтара Ангелина Захарова-Уһуйаана, Александра Капитонова-Һууракай, Айталина Олесова-Айталыына “Айар иэйии” хоһоонньуттар Сайдыына Нарыйаана Уус Кыыһа “Уус”, Оксана Абрамова-Кэскилээнэ “Күөрдэм кустуктара уруһуйдьуттар” түһүлгэлэригэр кыттыыны ыллыбыт. Кэрэхсэбиллээҕэ бу үс тэрээһин барыта хомуска ананна.
Ол курдук бастакы түһүлгэҕэ хоһоонньуттар хомус туһунан хоһооннорун дьүүллүүр сүбэ иннигэр аахтылар, салгыы тута хоһуйууга күөн көрүстүлэр. Манна Горнайтан “Сыккыс”, Мэҥэ Хаҥаластан “Таммахтар”, Намтан “Отуу уота”, Дьокуускайтан “Айар кут”, “Кырсаада”, өрөспүүбүлүкэтээҕи “Иэйии”, Покровскайтан “Өлүөнэ долгуннара” уонна олохтоох “Күөрэгэйдээх Күөрдэмнэр” литературнай түмсүүлэр кыттыыны ыллылар. Бу түһүлгэни Ситим КК дириэктэрэ Саргылана Федорова-Саргылана Сайын уонна Күөрэгэйдээх Күөрдэмнэр литературнай түмсүү кыттыылаахтара иилээн-саҕалаан ыыттылар.
Иккис түһүлгэ – “Күөрдэм кустуктара” уруһуйдьуттар түһүлгэлэрин Самыртай музей үлэһиттэрэ, дириэктэр Матрена Захарова, научнай үлэһит Февронья Ефремова салайан ыыттылар. Манна айар талааннаах дьон уус тэриллэрин, оҥоһуктарын холустаҕа үйэтиттилэр, уруһуйдьуттар түһүлгэлэригэр искусство үтүөлээх деятелэ, СӨ норуодунай худуоһунньуга ойуулуур-дьүһүннүүр искусство үөрүйэхтэрин Александра Бочкарева-Иннокентьева билиһиннэрдэ. Түһүлгэ үлэтин Лариса Далбараева-Далбар ыытта.
Үһүс түһүлгэ – Уус түһүлгэтэ. ПФКИ гранын кыайыылааҕа «Уусхомусфест» бырайыак былааннаах үлэтэ буолар. Тэрээһин “Болгуо тимир төрөөһүнэ”диэн ааттанан, бу күн бэйэтин тула бэрт элбэх уустары, көрөөччүлэри муста. Александр Данилов-Хаҥыл уус баһылыктаах уустар үлэлэрэ күөстүү оргуйда. Манна уопсайа 17 киилэ тимир болгуо таҕыста, болгуо салгыы Дьокуускайга хатарыллан-уһаарыллан, чочуллан таптайыллан сэтинньигэ 20 хомус оҥоһуллан тахсыахтаах диэн сырдаттылар. Горнайтан Сайдыына Нарыйаана Уус Кыыһа симии оһох оҥоһуллан, тимир уулларан, болгуо таһаарааһыныгар кытынна.
“Сыккыс” түмсүүттэн Айталина Олесова “Айар иэйии” түһүлгэтигэр тута хоһуйууга кыттаммын биһирэбил бэлиэнэн бэлиэтэнним, Ангелина Захарова, Александра Капитонова, Оксана Абрамова, Сайдыына Нарыйаана Уус кыыһа, Розалия Иванова Туоһу сурук уонна бэлэх тутан бэртээхэй тэрээһиҥҥэ кыттан, сүргэбит көтөҕүллэн, үөрүүбүт үксээн, ыраах айантан сылайбакка да дьиэбитигэр эргилиннибит.
Улууспут Аҕа баһылыгын Н.В.Андреев “Махтал суругун” уонна кинигэ бэлэҕин тэрийээччигэ “Ситим” КК дириэктэригэр Саргылана Федороваҕа махтанан туран туттардыбыт. Бу айаммытын өйөөн, массыына биэрэн ыыппыт “Мэхээлэ Дьөгүөрэп” аатынан Сынньалаҥ Киин дириэктэригэр Алексей Оконешниковка, ыраах айаҥҥа суоппардаан илдьэ сылдьыбыт Семен Саввиҥҥа махталбытын тириэрдэбит!
Айталина Олесова