Бүгүн Кировскайга биир бэлиэ күн буолла. Ол курдук, олохтоохтор үөрүүлэригэр «Одуванчик» оҕо уһуйаана хапытаалынай өрөмүөн кэнниттэн кырачаан оҕолорго аанын тэлэччи арыйда.
1988 с үлэҕэ киирбит уһуйааҥҥа ымпыгар-чымпыгар тиийэ хаачыстыбалаах үлэни ресурснай хааччыйыы киинэ (дириэктэр Албан Стрекалавскай), «ДСА ПК» ХЭТ (Константин Николаев) уонна «Стройгазсервис» (Ньургун Климов) толорон, нэһилиэнньэҕэ бэлэхтээтэ. Ону таһынан, үлэҕэ олохтоох дьон бэйэлэрин кылааттарын киллэрсибиттэриттэн үөрүүлэрэ үгүс. Өрөмүөн үлэтэ национальнай бырайыак чэрчитинэн ыытылынна.
Оҕолор, төрөппүттэр тапталлаах уһуйааннара саҥа үөрэх дьылын баттаһа үлэтин саҕалыыр буолбутуттан икки бүк үөрэллэр. Кырачаан иитиллээччилэр сырдык, бары усулуобуйа тэриллибит уһуйааннарыгар киирэллэрин долгуйа күүтэллэр.
Үөрэх уонна наука миниистирэ Нюргуна Соколова киэн туттан туран сэбиэдиссэй Дария Парниковаҕа РФ үөрэҕириитин Бочуоттаах үлэһитэ үрдүк наҕарааданы туттарбытын дьон дохсун ытыс тыаһынан көрүстэ. Улуус баһылыга Никита Андреев, нэһилиэк баһылыга Савва Данилов, тустаах салайааччылар уһуйаан кэлэктиибин, тутууну ыыппыт дьоҥҥо истиҥ махталларын тириэртилэр. Үөрэҕирии хайысхатыгар, оҕону иитиигэ ис сүрэхтэриттэн кыһамньылаах үлэни ыытар, истиҥ дьоммутугар СӨ Бырабыыталыстыбатын, улуус, нэһилиэк Махтал суруктары туттардылар.
Ыалдьыттарга анаан, оҕолор ырыа-тойук бэлэхтээтилэр. Улууспут уһуйаанын үлэһиттэрэ биир идэлээхтэригэр ситиһиилэри баҕаран туран, Алгыстарын анаатылар.
Вячеслав Алексеев