Сыл аайы алтынньы 15 күнүгэр Аан дойдутааҕы «Үрүҥ торуоска» күнэ бэлиэтэнэр. «Үрүҥ торуоска» сүрүн сыалынан харахтара көрбөт уонна мөлтөхтүк көрөр дьоҥҥо уопсастыба болҕомтотун тардыы, тулуурдаах сыһыаны олохтооһун, инникигэ эрэли үөскэтии буолар.
Ол курдук, бу күн чэрчитинэн П.Д. Аввакумов аатынан киин модельнай библиотекаҕа көрбөт уонна мөлтөхтүк көрөр дьоҥҥо «Дууһаҥ сылааһын үллэһин» диэн Төгүрүк остуол буолан ааста.
Улуустааҕы бэтэрээн сэбиэтин бэрэссэдээтэлэ Любовь Пахомова, Пенсионнай фонда Горнайдааҕы салаатын Клиент сулууспатын салайааччыта Людмила Иванова-Чемезова, Горнайдааҕы нэһилиэнньэ социальнай көмүскэлин кэлим киинин сүрүн исписэлииһэ Сардана Гурьева, Горнайдааҕы киин балыыһа терапевт бырааһа Варвара Артамонова доруобуйаларынан хааччахтаах дьоҥҥо туох көмө баарын, саҥа эбиилэр, уларыйыылар киирбиттэрин иһитиннэрдилэр.
Улуустааҕы көрбөттөр уопсастыбаларын бэрэссэдээтэлэ Дмитрий Агеев, 18 сыл улуустааҕы көрбөттөр уопсастыбаларын салайбыт Россия пауэрлифтиҥҥа чемпиона Родион Дьяконов баҕа санааларын, эҕэрдэлэрин эттилэр. Родион Дьяконов чуолаан дьарыктыыр тренеригэр, ситиһиилэригэр төһүү күүс буолар Петр Никулиҥҥа махтанна.
Тэрээһин кыттыылаахтара остуол тула олорон араас кыһалҕалаах, мунаарар боппуруостарын ыйыттылар, санааларын үллэһиннилэр. Ааспыт кэм нууччалыы, сахалыы ырыаларын таайан, сэргэхсийдилэр, сүргэлэрэ көтөҕүлүннэ.
Инбэлииттэр уопсастыбаларын культурнай-спортивнай тэрээһиннэрин инструктора Иннокентий Кардашевскай көрбөт дьоҥҥо анаммыт остуол оонньууларын оонньотто. Уопсастыба чилиэннэрэ тэрээһинтэн элбэҕи биллилэр, сынньаннылар, тэрийээччилэргэ махтал тылларын эттилэр.
Марина Дашинимаева.