Үөрэх-билии күнүн көрсө С.П.Данилов аатын чиэстээхтик сүгэр Бэрдьигэстээх оскуолатыгар агротехнологическай кылаас үөрүүлээх арыллыыта буолла.
Манна оҕолор тыа сиригэр, тыа хаһаайыстыбатыгар үлэни чэпчэтэр, түргэтэтэр, сайыннарар хайысхалары тобулуохтара. Онон бу кылааска үөрэммит оҕо кэлин тыа хаһаайыстыбатын «күрдьэхтэн» арааран, цифровизацияны, компьютернай технологияны туһанарыгар олук ууруоҕа.
Республика үрдүнэн маннык кылаастар арыллан үлэлииллэригэр Арктикатааҕы судаарыстыбаннай агротехнологическай университет, Тыа хаһаайыстыбатын, үөрэх министерствота, оскуола, улуус салалтата төһүү күүс буолар. Онтон үбүлээһинэ «Кадры в АПК» федеральнай бырайыак иитинэн ыытыллар.
Саҥа арыллыбыт кылаас хаартыскаҕа көрөргүт курдук, олус тупсаҕай, аныгы көстүүлээх. Миэбэл ыларга, кылаас ремонун оҥорорго ООО «Газпром недра» тэрилтэтэ көмөлөспүт. Онтон оборудование ыларга 4 мөлүйүөн үп көрүллэн, сотору кэминэн саҥа техникалар кэлэллэрэ күүтүллэр. Агротехнологическай кылаас үөрэнээччилэрэ робототехника, агрокоптердар (дроннар) уонна цифровой технологияны баһылыыллар.
Онон оскуола коллектива билиҥҥи кэмҥэ олус наадалаах хайысханы ылсыбыт. Инникитин агротехнологическай кылааһы бүтэрбит оҕолор, анал идэни баһылаан, улууспут сайдарыгар бэйэлэрин кылааттарын киллэрэллэригэр эрэлбит улахан.
Күннэй Алексеева