Бүгүн улууспутугар биир бэлиэ күн буолла. Ол курдук, Аһымаҕа “Одуванчик” оҕо уһуйаана күөх төлөнтөн сылытынар кыахтаммытын бэлиэтиир, үөрүүлээх тэрээһин буолла.
Санатан эттэххэ, икки сыллааҕыта туһааннаах объекка, федеральнай бырайыак чэрчитинэн толору хапытаалынай өрөмүөн ыытыллыбыта. Ол кэмтэн, уһуйаан биллэ сылыйан, тупсан оҕолор, төрөппүттэр, иитээччилэр үөрүүлэрэ муҥура суох. Аны, саҥа үөрэх дьылын көрсө, күөх төлөн киирэн, кырачаан дьоммутугар сөптөөх усулуобуйа тэриллэн, олохтоохтор санаалара өссө көтөҕүлүннэ.
Үөрүүлээх тэрээһин Владивостокка ыытылла турар Уһук Илиҥҥи экономическай форум күннэригэр сөп түбэһэн, олохтоохтор үөрүүлээрин Россия Президенэ Владимир Путин, регионнар салайааччылара, Ил Дархан Айсен Николаев куйаар ситимин нөҥүө үллэһиннилэр. Мустубут дьоҥҥо СӨ Ыччат дьыалатын уонна социальнай коммуникацияҕа миниистирэ Петр Шамаев, улуус баһылыга Никита Андреев, “”Кировскай нэһилиэгэ” ТСТ баһылыга Савва Данилов, “Сахатранснефтегаз” АУо кылаабынай инженерин солбуйааччы Петр Данилов инники былааннарын билиһиннэрэн туран, эҕэрдэлэрин тириэртилэр.
Саҥа объект үлэҕэ киирэригэр өрөспүүбүлүкэҕэ гаас үлэтин сүрүннүүр тэрилтэлэр “Магистраль” (Семен Потапов), “Полюс Газ Монтаж” (Айтал Сивцев), “Сахавелдинг” (Никита Винокуров) кылгас кэм иһигэр хаачыстыбалаахтык ыытан түмүктээтилэр. «Газпром» ,“Сахатранснефтегаз” АУо (генеральнай дириэктэр Алексей Колодезников) бырайыак үлэҕэ киирэригэр сүрүннээтилэр.
Тымныы тыйыс айылҕалаах Сахабыт сиригэр күөх төлөн киирбит сирдэригэр табыгастаах, быыстала, куттала суох үлэлиир хочуоллары туруорарга биир сүрүн болҕомто ууруллар. Маннык үлэ өрөспүүбүлүкэҕэ тарҕанарыгар бастакынан Горнай улууһа буолбута, улахан эппиэтинэстээх. Уһун кыстык кэнниттэн хочуоллар хайдах үлэлииллэрин ымпыгын-чымпыгын үөрэтэн, көрөн-истэн баран, атын улуустарга салайыллара былааннар. Ылыллыбыт соруктар тиһигин ситэн, олоххо киирэллэрэ дьон-сэргэ олорор усулуобуйата тупсарыгар туһаайылларын көрдөрөр.
“Одуванчик” оҕо уһуйаанын сэбиэдиссэйэ Дарья Парникова тустаах үлэттэн санаата көтөҕүллэ сылдьар. Хапытаалынай өрөмүөн кэнниттэн эргэ объект лаппа тубуста диир. Аны туспа хочуоллананнар, дьиэлэрэ итиитин-тымныытын ирдэбилгэ эппиэттиир гына бэйэлэрэ хонтуруоллууллар. Хочуоллар туруктарын, үлэни ыппыт “Полюс Газ Монтаж” тэрилтэтэ дуогабар быһыытынан биэс сыл устата көрүө-истиэ. Биир сүрүн табыгаһынан, күөх төлөн өҥөтүн оҥоруутугар төлөбүрүгэр барыстаах буолуо диэн эрэнэллэр.
Хас биирдии салайааччы, үлэһит кырачаан дьон туһугар ис санааларын ууран ылыстыллар диэн махталын биллэрэр. Үөрүүлээх бырааһынньыгы култуура үлэһиттэрэ, “Одуванчик” оҕо уһуйаанын иитиллээччилэрэ ылбаҕай ырыаларынан, оһуохайдаан ойоннор ситэрэн-хоторон, бэйэлэрин эҕэрдэлэрин тириэртилэр.
Вячеслав Алексеев