Бу кэнники сылларга улууспутугар мүөттээх ыҥырыанан дьарыгырар дьоммут элбээн иһэллэрэ үөрдэр. Маныаха саҥа көрүҥ хайысха сайдарыгар, мүөт оҥорон таһаарыы кээмэйэ улаатарын туһугар улуус, нэһилиэк дьаһалтата, тыа хаһаайыстыбатын управлениетын бырагыраамалара бириэмэтигэр сүрүн болҕомтону уурдулар.
Бэйэбит олохтоох мүөппүт амтанныын да минньигэс “Горнайбыт мүөтэ” диэн этэргэ да астык буоллаҕа. Ону тэҥэ улууспут, өрөспүүбүлүкэбит экономическай сайдыытыгар, нэһилиэнньэ дьарыктаах буолуутугар сүҥкэн көмөлөөх буолара саарбахтаммат. Ол курдук, Бэрдьигэстээххэ бу хайысханы өссө биир чааһынай хаһаайыстыбалаах дьиэ кэргэн Мария, Тимур Агеевтар ылыстылар. Бу күннэргэ дьиэ хаһаайкатын Марияны кытта көрсөн сиһилии билистибит.
– Мария, дорообо! Саҥа былааҥҥытын олоххо киллэрэн, кэскиллээх үлэҕит саҕаламмытынан эҕэрдэлиибин. Туох санааттан чопчу бу хайысханы таллыгыт ?
– Нина, махтал. Уопсай биир дьарыктаах буолуу табыгастааҕын таһынан, түмсүүлээх буолууга сирдиир. Ону ыраата барбакка бэйэбит улууспут дьонуттан да элбэҕи холобурдаан этиэххэ, көрүөххэ сөп. Эрдэттэн мүөттээх ыҥырыаны иитээр дьону олус сэргээччибин. Чугастык билсэр дьонум мүөттэрин атыытыгар-тутуутугар көмө-тирэх буолааччыбын.
Онтон быйылгыттан дьэ бэйэбит саҕалаатыбыт. Ол курдук өрөспүүбүлүкэҕэ киэҥник биллэр, биһиги улууспутугар мүөттээх ыҥырыаны иитиигэ, сайыннарыыга үлэлэһэр Марат Заляловтан 50 мүөттээх ыҥырыа “дьиэ кэргэни” атыыласпыппыт. Сайын пасекабытын Одуну, Бэрдьигэстээх нэһилиэктэрин икки ардыгар Сииттэ үрэх тардыытыгар, кучу сибэкки өлгөмнүк үүнэр сиригэр туруорбуппут. Этэҥҥэ бары сайылаатылар. Бу күһүн 800 кг тахса мүөтү хомуйан, астаан бородууксуйабытын Чурапчыга, Тааттаҕа атыыга таһааран олоробут.
Улууспутугар иккитэ уонна куоракка “Продовольствие-2025 г.” улахан атыы-эргиэн дьаарбаҥкатыгар кыттыыны ылбыппыт. Ыҥырыа барыһа араас төрүөттэн туруон сөп. Ол эбэтэр, хайдах сайын буоларыттан, хайдах кыһыны туораан тахсалларыттан, ону тэҥэ доруобай дьиэ кэргэннэриттэн, сириттэн-уотуттан, көрүүтүттэн-истиититтэн олус тутулуктаах. Билигин анал кыстатар сирбит суох буолан, ыҥырыаларбыт Хатаска Марат Заляловка кыстаан тураллар. Билбэппит-көрбөппүт элбэх, уопуттаах үлэһиттэртэн, анал исписэлиистэртэн ыйыталаһа, сүбэлэтэ олоробут. Улууспут быйыл ыҥырыанан дьарыктанар дьону өйүүр анал бырагырааманан, ороскуоппутун 50 % төнүннэрдэ. Онон саҥа саҕалааччылар улахан көмөнү туһанныбыт. Түгэнинэн туһанан, улууспут, нэһилиэкпит баһылыктарыгар, тыа хаһаайыстыбатын управлениятыгар, настаабынньыктарбытыгар улахан махталбытын тириэрдэбит. Инникитин өссө салгыы дьарыгыран кэҥэтэр, элбэтэр былааннаахпыт.
Бу курдук улууспутугар саҥа хайысха хорутуулаахтык киирдэ. Санатан эттэххэ, “2024-2028 сс. Горнайга тыа хаһаайыстыбатын сайдыыта” диэн муниципальнай бырагыраама чэрчитинэн мүөттээх ыҥырыанан дьарыктанар хаһаайыстыбаларга быйыл 1,5 мөл. солк. көрүллүбүтэ төһүү күүс буолла.
Бигэ туругу сайыннарыыга туһуламмыт хамсааһыннар кэҥии турдуннар.
Нина Сутакова