Бүгүн улууспутун өр сыл аһынан-үөлүнэн хааччыйан олорор «Айтал» атыы-эргиэн киинэ улахан өрөмүөн кэнниттэн үлэтин саҥалыы тыыннаан, аанын тэлэччи арыйда.
– «Айтал» маҕаһыыҥҥа улахан өрөмүөн үлэтин ыыттыбыт. Муостата саҥардылынна, саҥа полкалар эбилиннилэр. Маҕаһыыммытыгар үлэһиттэри ылан, таһаарыылаахтык үлэлииргэ бэлэммит. Олохтоох бородууксуйаттан саҕалаан, продукталар, бытовой табаардар атыыга бааллар. Уруккуттан бииргэ үлэлэһэн кэлбит табаарынан хааччыйааччыларбытын кытта сөбүлэҥ түһэристибит. «Айтал» маҕаһыына кэтэһэр, – диэн маҕаһыын дириэктэрэ Мичил Андреев сырдатта.
Улууска аан бастакы урбаанньыттартан биирдэстэрэ Петр Николаевич, Сардаана Ильинична Андреевтар дьиэ кэргэнинэн кэскиллээх дьарыктарын уоллара Мичил Андреев ылсан, үлэлэтэн эрэрэ хайҕаллаах. Эдэр урбаанньыкка саҥаттан саҥа ситиһиилэри, арыйыылары, үрдүк дабайыылары баҕарабыт.
Нина Сутакова