В.Д.Лонгинов аатынан Атамай орто оскуолатын үөрэнээччилэрэ Бүтүн Россиятааҕы «Эдэр чинчийээччи» научнай фестиваль финалыгар тиийэн, дойдуларын аатын үрдүктүк ааттаттылар. Фестивальга дойду араас регионнарыттан 300 тахса кыттааччы кытынна.
Хас да түһүмэхтээх «Эдэр чинчийээччи» конференция бүтэһик түһүмэҕэр ыҥырыллан, чинчийэр үлэлэрин улахан учуонайдар иннилэригэр ситиһиилээхтик көмүскээтилэр.
Айсар Павлов, IV кылаас үөрэнээччитэ «Социальные науки» секция 1 үктэллээх Лауреата буолла. Ону тэҥэ конференция «Бастыҥ үлэтэ» муҥутуур үрдүк ааты ылан, көмүс мэтээлинэн, сыаналаах бирииһинэн наҕараадаланна. Саха остуолун оонньуулара оҕо өйүн сатабылын үрдэтэр суолтатын экспертэр иннилэригэр эрэллээхтик дакаастаата. Салайааччылара Татьяна Павлова, Маргарита Степанова.
Чаҕыл Федоров, IV кылаас үөрэнээччитэ «Краеведение» секция 1 үктэллээх Лауреата буолары ситистэ. Саха сиригэр биир бастыҥынан биллэр, Федоровтар дьиэ кэргэн биэ үүтүттэн кымыс оҥорор сатабылларын көрдөрөн, утуму салгыыр ыччат буоларын кэпсээн, көрөөччүлэр үрдүк биһирэбиллэрин, махталларын ылла. Салайааччылара Диана Федорова, Маргарита Степанова.
Динара Яковлева, III кылаас үөрэнээччитэ «Биология и медицина» секция 1 үктэллээх Лауреата буолла. Баһаар кэннэ киртийбит үрэх уутун ыраастыыр аныгы тэрил үлэтин, нэһилиэнньэни ыраас уунан хааччыйыы үлэтин, ыраас уу доруобуйаҕа улахан туһалааҕын чинчийэн, тиэмэтин дириҥник арыйда. Салайааччыта Саргылаана Иванова.
Слава Алексеев, III кылаас үөрэнээччитэ «Технические науки» секцияҕа 1 үктэллээх Лауреат үрдүк аатын ылла. Бэйэ илиитинэн оҥоһуллубут турник уратытын, бөҕөтүн, экономическай өттүнэн барыһын көрдөрөн сөхтөрдө. Салайааччы Саргылаана Иванова.
Арылхан Аввакумов, III кылаас үөрэнээччитэ «Экология» секция II үктэллээх лауреата буолан наҕараадаланна. Арылхан Бүтүн Россияҕа аатырбыт «Атамай мүөтүн» оҥорор Осиповтар дьиэ кэргэттэрин ураты дьарыктарын, мүөт оҥоруу кистэлэҥин, туһатын туһунан кэпсээн, дьүүллүүр сүбэ үрдүк хайҕабылын ылла. Салайааччы Саргылаана Иванова.
Коля Яковлев, 4 кылаас үөрэнээччитэ«Биология» секция 2 үктэллээх Лауреата. Коля эрэллээх доҕорун, Хаарчаана диэн ытын ураты боруодатын, майгытын туһунан кэтээн көрбүтүн, чинчийбитин кэпсээн көрөөччү ураты тапталын, биһирэбилин ылла.
Фестиваль чэрчитинэн ыытыллыбыт Бүтүн Россиятааҕы интеллектуальнай олимпиадаҕа Айсар Павлов элбэх кыттааччыттан 3 миэстэҕэ таҕыста, үрдүк сыанаттан наҕараада тутта.
Хамаанданан күрэхтэргэ үөрэнээччилэрбит эмиэ үрдүк ситиһиилэннилэр. Ол курдук «Волшебство науки» диэн тиэмэлээх бэйэни билиһиннэрии күрэҕэр: саха алмааһынан, дьүкээбилинэн, тыйыс тымныытынан наука айылҕаны кытары быһаччы сибээһин көрдөрөн, көрөөччү ураты болҕомтотун ылан, муҥутуур кыайыылаах буоллулар.
Аны хамаандалар икки ардыларыгар ыытыллыбыт научнай квест оонньууга III миэстэ буолары ситистилэр. Ити курдук, уопсай хамаанданан зачетка Атамай оҕолоро III миэстэҕэ тахсан, дойдуларыгар улахан ситиһиини аҕаллылар.
Учууталлара, төрөппүттэрэ, биир дойдулаахтара оҕолорбутунан киэн туттабыт. Дойдугутун ааттатар, патриот дьон буола улаатын диэн алгыыбыт.
Татьяна Павлова