Улууспут саамай ыраах нэһилиэгэр Маалтааныга сэргэх үөрэх дьыла саҕаланна. Кэптин агро хайысхалаах орто оскуолатыгар түөрт эдэр учуутал үлэлэрин саҕалаатылар.
Нам улууһун Тумул нэһилиэгиттэн сылдьар Нарыйаана Дмитриевна Охлопкова директоры иитэр үлэҕэ солбуйааччынан, оҕо общественнай тэрилтэлэрин үлэтин тэрийэр педагога.
Бүлүү улууһун бастакы Күүлэтиттэн сылдьар Анжела Станиславовна Тутукарова үөрэнээччилэри саха тылыгар уонна литературатыгар үөрэтиэ.
Икки эдэр учууталлар төрөөбүт нэһилиэктэригэр, үөрэммит оскуолаларыгар үлэлии кэлбиттэрэ хайҕаллаах. Мирабелла Петровна Иванова технология уонна уруһуй учуутала.
Сандал Михайлович Андреев трактороведение , оҥорон таһаарыы үөрүйэхтэригэр учуутала.
Кэптин орто оскуолата дириҥ историялаах, чиҥ билиини биэрэр үөрэх кыһата буолар. Оскуола билим эйгэтигэр үлэлиир элбэх учуонайдары, салайар үлэҕэ кэскиллээхтик үлэлиир салайааччылары үөрэтэн таһаарбыт оскуоланан улууска биллэр.
Эдэр учууталларга үөрэнээччилэргит тапталын, төрөппүт махталын ылан кэскиллээх үлэҕит сырдык аартыгар ситиһиилэри баҕарабыт.
Лена Саввинова,
Кэптин сынньалаҥ киинин художественнай салайааччыта.