Кулун тутар 7 күнүгэр удьуор булчут, бөрөһүт Бүөтүр Жирков хара тыаттан илии тутуурдаах, өттүк харалаах киирдэ. Кини бизоннар олохсуйан турар Тыымпынай сириттэн үс (икки тыһы уонна атыыр) ардай аһыылааҕы бултаан аҕалла.
– Биир ийэ ууһа баар. Олортон биирдэстэрэ хапкааҥҥа хаптаран баран ситтэрбэтэ. Хас да күн устата батыһа сатаатым да кыайтарбата. Арааһа чэҥкээйитэ түспүт быһыылаах. Дьиҥэр ыраатыа суохтаах этэ. Эккирэтиһэ сылдьаммын, уолбун Куоланы суохтаатым. Кини дьэ инниккэ үчүгэй. Сиэбигэр ыһык угунна да, бара турааччы. Күнү-күннээн сонордоһооччу. СВО-ҕа этэҥҥэ сылдьан, кэлэн бултуо этэ. Бэйэм 75 сааспар үктэнним. Сааһыраммын уһуннук эккирэтиспэт буоллум.
Сиинэ уҥуор туйахтаах кыыл көҥүл хаама сылдьара, аһыы турара көстүбэт ээ. Бу харамайдар дьэ кинилэри кыайа туталлар. Таба, туртас суола отой суох. Биир эмэ тайах суола быһа охсон ааһар. Бөрө тыатааҕы курдук буолбатах. Холобур, эһэ кыһын утуйар уонна сир аһа аһылыктаах. Оттон бөрө сыл устата аһаан тахсар. Айылҕаҕа төһөлөөх хоромньуну аҕалара буолуой. Наука бигэргэппитинэн биир бөрө сэттэ тайаҕы сиэн кыстыыр эбит. Ол аата ити сэттэ оҕолоох биир ийэ ууһа аһыырыгар төһө тайах нааданый. Дьэ оннук. Онон бултанара, хонтуруолланара хайаан да наада.
Бу кэмҥэ 50-ча хапкааны иитэн турабын. Кыратык сынньанан баран барыам. Бизонарий салалтата толору өйүүр, көмөлөһөр, онон үчүгэй. Билигин ити уолаттары үөрэтэбин. Хата, маладьыастар булка баҕалаахтар. Бөрөлөр бизоннары туппуттара иһиллибэт, көстүбэт. Кытаанахтык көмүскэнэллэр. Онон куттал суоһаабат курдук. Тайах көҥүлэ наһаа уһун дии саныыбын.
Кылгатары туруорсубум ыраатта. Ону таһынан, Сиинэ сирин-уотун көрөн, булчуттарга биэрэр кэм кэллэ. Чугас эргин наһаа элбэх киһи мустан бултуур буолла. Киһи кэнниттэн киһи сылдьар буолааччы. Онон ити боппуруоһу үөрэтэн, ырытан көрүөххэ сөп эбитэ дуу, – диэн Бүөтүр сэһэргиир.
Горнай бөрөһүттэрэ бу кэмҥэ бултуйан эрэллэр. Айылҕа харыстабылын Горнайдааҕы инспекцията иһитиннэрбитинэн Мытаахха Александр Андреев түөрт, Солоҕоҥҥо Вячеслав Лукин, Маалтааныга Иннокентий Заровняев иккилии, Кировскайга Николай Леонтьев, Одунуга Степан Контоев, Маалтааныга Анатолий Сидоров биирдии ардай аһыылааҕы үктэттилэр.
Вячеслав Алексеев
Елена Дьячковская видеоҕа устуута