Афанасий Осипов аатынан оскуола салалтата (дириэктэр Анджелика Гаврильева) үөрэнээччилэр санааларын ылынан, олоххо киллэриигэ үгүс үлэни ыытар. Улуус оскуолаларын кытары хардарыта үлэҕэ көхтөөх тэрээһиннэри ыытан, оҕолор бары өттүнэн сайдыылаах буолалларыгар ураты болҕомтону уурар.
Оскуола Президенэ IX «а» кылаас үөрэнээччитэ Дайаана Иванова көҕүлээһининэн үөрэнээччилэр ортолоругар «CS-2.0» компьютернай оонньуу 45 оҕону түмтэ. Күрэхтэһиини оҕолор үөрүүнэн астына ылыннылар. Бэл сынньаналларын умнан, умсугуйан туран кииристилэр. Бу күрэхтэһиигэ Сэмэн Данилов аатынан оскуола үөрэнээччилэрэ кыттаннар, бэйэлэрин сатабылларын, билиилэрин-көрүүлэрин көрдөрбүттэрэ кэрэхсэбиллээх.
Түмүккэ, бастакы «VCVC» хамаандата (Ильдар Лаптев, Оскар Иванов, Максим Бельды, Арылхан Михайлов, Лев Борисов), иккис «NOVA» (Виталий Жирков, Айхал Васильев, Ярик Степанов, Мирон Бурнашев, Дьулус Екечьямов), үһүс миэстэни «WW» (Вася Осипов, Стас Мамаев, Дархан Константинов, Влад Винокуров, Любомир Жирков) ылла.
Бастыҥ оонньооччу номинацияҕа Ильдар Лаптев тигистэ. Оскуола Президенин анал бирииһин VIII «в» кылааһын хамаандата ылла. Күрэхтэһиини Афанасий Осипов аатынан оскуола учууталлара Роман Капитонов, Дмитрий Тарасов иилээн-салайан ыыттылар.
Сэргэх күрэхтэһии үрдүк таһымҥа ыытылларыгар спонсордар ураты болҕомтону уурдулар. Оҕолорго «Южный» атыы-эргиэн киинин, «У Зины» маҕаһыын, «Принтекс» полиграфия студиятын салалтата, ИП Потап Павлов, ИП Егор Павлов сыаналаах бириистэри олохтоотулар.
Оҕолор, кинилэргэ биир туһалаах күнү бэлэхтээбит оскуола салалтатыгар, бары тэрээһиннэргэ көхтөөхтүк кыттар төрөппүттэригэр, учууталларыгар, сүүрэн-көтөн, күрэхтэһии ыытылларын ситиспит Дайаана Ивановаҕа, урбаанньыт Вадим Ивановка махталларын биллэрэллэр.
Вячеслав Алексеев