Горнайга дартс көрүӈэ спорт саӈа көрүҥэ быһыытынан улаханнык биһирэнэр буолла. Хас да төгүл күрэхтэһиилэр ыытыллан, дьон биһирэбилин ылла. Билигин сорох тэрээһиннэргэ, бэлиэ күннэргэ бэйэ икки ардыгар кытары оонньуохха сөп. Үгүс тэрилтэлэргэ сынньана таарыйа дьарыктанан ылаллар.
Кэнники кэмҥэ өрөспүүбүлүкэ иһигэр, араас таһымнаах күрэхтэһиилэр ыытыллаллар. Онно Горнай спортсменнара мэлльи кыттар буолбуттара кэрэхсэбиллээх.
Биһиэх дартс көрүҥүн көҕүлээччи дьоннорунан Герасим Дьяконовы уонна Марк Никифоровы ааттыыбыт. «Бэргэн» СК иһинэн, хас да күрэхтэһиини тэрийдилэр. Онно көрдөххө, олус элбэх киһи спорт бу көрүҥүн сэҥээрэр эбит. Дьиэбитигэр оонньуубут диэччилэр аҕыйаҕа суохтар.
Бу күннэргэ Дьокуускайга өрөспүүбүлүкэ чемпионата түмүктэннэ. Улахан таһымнаах күрэхтэһиигэ биһиги дьоммут Герасим Дьяконов, Федор Иванов, Марк Никифоров, Афанасий Дмитриев, Александр Васильев бэркэ кытыннылар. Төһө да үс бастыҥ иһигэр киирбэтэллэр. Пьедесталтан чугас сылдьаллар диэххэ сөп. Утарсааччы быһыытынан сыаналанар буоллулар. Марк Никифоров күүстээх спортсменнары хотон, бэһис көрдөрүүлэммитин уопуттаах маастардар сөҕө-махтайа бэлиэтээтилэр.
Спорт бу көрүҥүн көҕүлээччи дьоммут, улуустарын аатын ааттатарга бары күүстэрин уураллара хайҕаллаах суол. Биир дойдулаахтарын «дартс» курдук бары өттүнэн табыгастаах, тиийимтиэ көрүҥүнэн дьарыктаналларыгар ыҥыраллар.
Вячеслав Алексеев