Бүгүн П.Д.Аввакумов аатынан Киин библиотекаҕа «Точка здоровья» диэн сүрэх, тымыр кэһиллиилэрин сэрэтэргэ аналлаах терминал үөрүүлээх арыллыыта буолла.
Улууска доруобуйа сылыгар анаммыт саҥа хамсааһыҥҥа улуус баһылыгын бастакы солбуйааччыта Сардаана Стручкова, Бэрдьигэстээх нэһилиэгин баһылыга Алексей Аргунов, улуустааҕы Киин балыыһа кылаабынай бырааһын тэрийэр-методическай үлэҕэ солбуйааччыта Вилена Новикова, кииннэммит библиотечнай ситим дириэктэрэ Анна Иванова уо.д.а кыттыыны ыллылар.
Бу үөрүүлээх түгэҥҥэ улуустааҕы Киин балыыһа аатыттан «Точка Здоровья» терминал бырагырааматын толкуйдаан таһаарбыт Семен Данилов аатынан Бэрдьигэстээх орто оскуолатын үөрэнээччилэригэр Петр Ксенофонтовка, Герман Бережновка уонна Вадим Федоровка Махтал суруктарын, сертификаттары туттардылар.
Санатар буоллахха, улуустааҕы киин балыыһа ааспыт «Хакатон» диэн айти хайысхалаах куоҥкурус чэрчитинэн оскуолаҕа оҕолоругар бу хайысхаҕа үлэ биэрэн, маннык нэһилиэнньэ олоҕор, медицина үлэлэригэр олус туһалаах саҕалааһын тэрилиннэ.
Улуус баһылыга Никита Андреев, улуустааҕы Киин балыыһа кылаабынай бырааһа Егор Григорьев уонна Киин библиотека биир сыаллаах-соруктаах былааннара, сайдыы аартыгар бигэ туругу чиҥэтэ туруохтун.
Нина Сутакова