Балаҕан ыйын 13 күнүгэр Кировскай нэһилиэгэр бэлиэ күн үүннэ. Ол курдук биһиги нэһилиэкпититтэн төрүттээх Саха АССР норуодунай худуоһунньуга, муосчут, чеканщик, скульптор Иван Фёдорович Мамаевка анаммыт сквер үөрүүлээх арыллыыта буолла.
Бу сквер олохтоох инициативаны өйүүр ППМИ программанан оҥоһулунна. Сквер дизайн-схематын бэйэбит кыыспыт, архитектор идэлээх Валерия Леонтьева оҥорбута. Подрядчигынан Иван Фёдорович Трофимов үлэлээтэ.
Бу бырайыак олоххо киириитигэр олохтоох нэһилиэнньэ, норуодунай худуоһунньук Мамаев И.Ф. сиэннэрэ, хос сиэннэрэ, аймахтара 189000 солк. кыттыспыттара, ИП «Данилова В.Н.» 50000 солк. спонсордаата, эбии нэһилиэк бюджетыттан харчы көрөн, республика бюджетыттан 1500000 солкуобай харчыны ылары ситиспиппит.
Сквер үөрүүлээх арыллыытыгар улуус баһылыга Никита Андреев, СӨ культураҕа уонна духуобунай сайдыыга миниистирэ Афанасий Ноев, Ил Түмэн депутата Алквиад Тарасов о.д.а кытыннылар.
Саха норуодунай худуоһунньуга Иван Фёдорович Мамаев аатын үйэтитэр сквер нэһилиэкпит историятын өссө дириҥэтэн үөрэтэргэ, ыччаттар төрөөбүт дойдуларынан киэн тутта улааталларыгар төһүү күүс буоларыгар эрэнэбит.
Саргылана Аргунова