Сандал сааһы көрсө Хотун Бүлүүттэн кэрэ сонун көтөн-дайан кэллэ. Биир дойдулаахпыт, Бүлүү куоратын кийиитэ, 4 кэрэчээн кыыс мааны ийэтэ Мария Быканова «Миссис Вилюй — 2025» диэн олохторун оҥостубут кэрэ аҥаардар куоҥкурустарын үрдүк кыайыылааҕынан ааттанна.
Биһиги редакциябыт Марияны уонна кини дьиэ кэргэнин эҕэрдэлээри сибээскэ тахса сырытта. Олус актыыбынай көрүүлээх-истиилээх элбэх оҕолоох Бүлүү эдэр, кэскиллээх ыала Алексей, Мария Быкановтар дьиэ кэргэнинэн бу кыһын Москваҕа ыытыллыбыт норуоттар икки ардыларынааҕы «Рождественские звезды» диэн бэстибээлгэ Гран-при хаһаайыттара буолаллар. Мантан куорсун анньынан, дьиэ хаһаайката, эдэр ийэ бу кэрэ куоҥкуруска кыттарга холонор.
Бүлүү бөлөх сиригэр-уотугар икки сылы быысыһыннаран, үгэс курдук ыытыллар, эдэр ыалы көҕүлүүр, кинилэри сырдатар куоҥкурус саамай бастыҥ, күүтүүлээх тэрээһининэн биллэр.
Мария Быканова:
— Быйылгы куоҥкуруска аҕыс ыал ийэтэ кыттыыны ылла. Хас биирдии түһүмэх ураты айымньылаахтык, киэҥ хабааннаахтык ыытылынна. Бэйэни билиһиннэриигэ дьылҕам бэлэҕэ буолбут оҕолорум төрөөбүт сирдэрин — Хотун Бүлүүнү киэҥник арыйан сырдаттым. Талаан түһүмэҕэ Аҕа дойдуну көмүскээччи сылыгар ананна. Анна Герман репертуарыттан «Мы эхо» диэн ырыаны кэргэмминээн толордубут. Бу түһүмэх тус бэйэбитин эрэ буолбакка, көрөөччүлэри эмиэ олус долгутта. Ырыа ис хоһооно сүрэхпит иһинэн киирэн, барыбытын да уйадытта. Кэргэним Алексей СВО-ҕа кыттыыны ылыыта, биһиги аймах киэн туттуубут буолар. Сахалыы төрүт таҥас түһүмэҕэр биир дойдулааҕым художник-модельер Августина Филиппова «Айыы Куо» диэн аатырбыт моделын уобараһынан, СӨ народнай поэта Иван Гоголев-Кындыл «Сэмээр таайа сатыыбын» диэн хоһоонун аахпыппыт. Бу хоһоон саҥа билсэ сылдьар эдэркээн уоллаах, кыыс сырдык иэйиилэрин арыйар.
Мария үрдүк кыайыытын дьиэ кэргэнигэр уонна саамай чугас дьүөгэлэригэр аныыр. Кэргэнэ Алексей Иванович Быканов Н.И.Ылахов аатынан «Алгыс» национальнай култуурунай Киин режиссера буолар. Иллэҥ кэмнэригэр бииргэ айылҕаҕа сылдьалларын туохтааҕар да ордороллор.
Бэрдьигэстээхтэн силистээх Фекла, Василий Степановтар мааны орто кыыстара Мария Васильевна Быканова Бүлүү куоратыгар түөрэҕин түһэрэн, мааны кийиит буолан, ньир-бааччы, оҕо-уруу тэнитэн, олоҕун оҥостон олороруттан биһиги биир дойдулаахтара үөрэбит, ситиһиитинэн эҕэрдэлиибит. Кини иллээх-эйэлээх дьиэ кэргэнигэр дьоллоох олоҕу баҕарабыт.
Нина Сутакова