Бүгүн улуус историятыгар сырдык суолу хаалларар бэлиэ күн тосхойдо. Ол курдук Семен Данилов аатынан Бэрдьигэстээх орто оскуолатын дириэктэрэ Павел Петров, улуус баһылыга Никита Андреев, В.А. Вонгродскай аатынан Дьокуускайдааҕы медицинскэй колледж дириэктэрэ Дмитрий Алексеев, улуустааҕы киин балыыһа эмтиир салааҕа солбуйааччыта Татьяна Юмшанова буоланнар, биир ситимнээх үлэни ыытарга сөбүлэҥ баттастылар.
Ол курдук кэлэр 2027 с. улууспутугар саҥа оскуола баазатыгар В.А.Вонгродскай аатынан медицинскэй колледж филиала арыллан, фельдшер уонна медицинскэй сиэстэрэ идэлэригэр үөрэтиэхтэрэ. Бюджетнай миэстэҕэ фельдшергэ, медицинскэй сиэстэрэҕэ 25-тии устудьуон үөрэнэрэ былааннанар.
Бу социальнай хайысхалаах бырайыакка сааһыттан тутулуга суох улуус олохтоохторо миэстэтигэр бу сырдык идэни толору баһылыыр кыахтаныахтара.
Улуус баһылыга Никита Андреев тыа сирин сайдыытыгар сүрүн олугу уурар, кэскиллээх саҕалааьын кыттааччыларыгар, медицинэ хайысхатын сыаналыыр, интэриэһиргиир үөрэнээччилэргэ уо.д.а үтүө махтал тылларын тириэртэ, биир тэтимнээх үлэҕэ ыҥырда.
Бу күн анал көрсүһүүлэр, маастар-кылаастар, трениннэр, өйү сайыннарар оонньуулар, төрөппүттэри кытта аһаҕас көрсүһүүлэр ыытылла тураллар.
Нина Сутакова