Бүгүн, балаҕан ыйын 26 күнүгэр, Бэрдьигэстээххэ комплекснай спартакиада көрүҥнэригэр киирэр остуол тиэнниһигэр нэһилиэктэр икки ардыларынааҕы күрэхтэһии буолла.
Күрэхтэһии үөрүүлээх аһыллыыта үрдүк таһымнаахтык барда.
Спортсменнары улуус баһылыгын бастакы солбуйааччы Сардаана Стручкова, Бэрдьигэстээх баһылыгын солбуйааччы Ксения Васильева, улуус спартакиадаҕа кыттыытын сүүмэрдиир хамаандатын старшай тренерэ Радомир Сидоров, улуустааҕы остуол тиэнниһин федерациятын салайааччыта Валентин Петров эҕэрдэлээтилэр.
Нэһилиэктэр бары кытыннылар. Күн устата маннык эрийсиилээх киирсии өтөр-наар буолбатаҕа дииллэр.
Таһыма олус үрдүк. Ону бу көрүҥҥэ араас бөлөххө Саха сирин чемпионнара, Россия призерэ, үс маастарга кандидат да оонньообута туоһулуур.
Бастакы ракеткаҕа кыайыылааҕынан маастарга кандидат Родион Сидоров (Бэрдьигэстээх), иккис маастарга кандидат Мичил Максимов (Одуну), үһүс Федор Иванов (Маҥаны) таҕыстылар.
Иккис ракеткаҕа туһааннааҕынан миэстэлэстилэр: Валентин Петров (Маҥаны), Петр Александров (Бэрдьигэстээх), Александр Пахомов (Мытаах).
Дьахталларга Бэрдьигэстээхтэн маастарга кандидат София Колодезникова тэҥнээҕин булбата. Иккис Элен Романова (Мытаах), үһүс Анна Мохначевская (Маалтааны).
Эр дьоҥҥо муҥутуур кыайыылааҕы быһаарар киирсиигэ Родион Сидоров кыайда.
Онон хамаанданан миэстэлэр маннык буолла :I -Бэрдьигэстээх, II-Маҥаны, III — Маалтааны, IV-Мытаах, V — Одуну, VI — Октябрьскай, VII -Солоҕон, VIII -Кировскай, IX- Атамай.
Бу күрэхтэһии призердарыттан улуус хамаандата талыллан, эһиил Ньурбаҕа буолуохтаах Саха сирин норуоттарын спартакиадатыгар кыттар иһин кытаанах киирсиини ааһыахтара.
Василий Алексеев