Бүгүн улуус баһылыга Никита Андреев, Айылҕа харыстабылын инспекциятын салайааччыта Родион Сергеев, булт улуустааҕы хамыыһыйатын кыттыылаахтарын кытары 2025-2026 с.с. булт сезонугар уопсай бултанар сиргэ көрүллүбүт 35 % квотаҕа сэрэбиэй хайдах быһыылаахтык ыытылларын көрдүлэр.
Улуус олохтоохторо күүтэр туйахтаах кыылга, хагдаҥ эһэҕэ хас лицензия бэриллибитин туһунан Родион Сергеев билиһиннэрдэ. Ол курдук, улуус үрдүнэн булт хаһаайыстыбаларыгар, научнай үлэҕэ көрүллэр, ураты харыстанар сирдэргэ, эһэ, бөрө булдугар, кыылы аһатыыга, ойуур баһаарын умулларыытыгар кыттыбыттарга барытыгар 320 тайах, 373 туртас, 182 таба, 51 эһэ, 2 кулааһай көрүлүннэ.
Итинтэн уопсай бултанар сиргэ тайахха 27 лицензия оонньонуо. Ол иһигэр, сүүлүн кэмигэр 1 лицензияҕа – 53 сайаапка киирдэ. Улахан тайахха 19 – 650, 1 сааһыгар диэри 7 – 100.
Туртаска – 51 лицензия. Сүүлүн кэмигэр 3 – 24, тутулуга суох 31 – 225, 1 сааһыгар диэри 17 – 59.
Таба – 24. Тутулуга суох 19 – 101, 1 сааһыгар диэри 5 – 25.
Хагдаҥ эһэҕэ 3 – 27.
Туох уларыйыыта баар диэтэххэ, лицензияҕа түбэспит киһи балаҕан ыйын 1 күнүгэр диэри ылбатаҕына, лицензия хаттаан оонньонууга барыаҕа. Онно сэрэбиэйдэммит лицензиялар биир ый эрэ иһигэр бултанар кыахтаналлар. Бу уларытыы ордук хаһаайыстыбалаах дьон ыытар үлэлэрин хабара буолуо.
Куспут, мас көтөрбүт атырдьах ыйын 21 күнүттэн көҥүллэниэ. Инники сылларга атырдьах ыйын үһүс субуотатыттан көҥүллэнэрэ. Билигин биир даата олохтонно.
Анал ытынан кустааччылар бу ый 15 күнүттэн саҕалыахтара. Курупааскыга бултааһын болдьоҕо тохсунньу 31 күнүгэр диэри чугаһаан биэрдэ. Балаҕан ыйын 1 күнүттэн булт билиэтин ылыыга аны тест (200 тиийэ боппуруостаах) туттарыахпыт. Урут сайаапканан этэ.
Сайаапканан лицензияны оонньотуу элбэх хайысхалаах спортивнай комплекска атырдьах ыйын 4 күнүгэр (бэнидиэнньик) 11 чаастан ыытыллыаҕа.
Туйахтаах кыылга уонна хагдаҥ эһэҕэ бултуурга сайаапка биэрбит дьон, охот билиэқкит нүөмэринэн mr-gornyj.sakha.gov.ru. уонна minpriroda.sakha.gov.ru. сайтка тэҥниэххитин сөп.
Түмүктэрэ улуус дьаһалтатын, “Үлэ күүһэ” хаһыат, СӨ Экология министиэристибэтин официальнай сайтарыгар тахсыахтара уонна Бэрдьигэстээххэ айылҕа харыстабылын инспекциятын дьиэтигэр туруоруохтара.
Вячеслав Алексеев.