Бэрдьигэстээххэ күөх төлөнү киллэрии үлэтэ тэтимнээхтик салҕанар. “Сахатранснефтегаз” тэрилтэ “Үрдэл” түөлбэ Манчаары, Чагда, Бекасова уулуссаларга гаас ситимин холбуурга түмүктүүр үлэни ыыта сылдьар.
Магистрал устун бастакы гаас барыытын үөрүүлээх тэрээһинигэр улуус баһылыга Никита Андреев, «Сахатранснефтегаз» АУо кылаабынай инженерин солбуйааччы Петр Данилов, Горнайдааҕы ЭГУ начаалынньыга Юрий Алексеев, «Бэрдьигэстээх нэһилиэгэ» ТСТ баһылыга Алексей Аргунов, олохтоохтор кыттыыны ыллылар.
Туһааннаах тэрилтэ, бэрт кылгас кэм иһигэр үлэни кыһамньылаахтык ыытан, олохтоохтор уһун кыстыкка сылаас күнү-дьылы баттаһа бэлэмнээх буолар кыахтаннылар. Салалтата ханнык ыалларга туох уустуктар баалларын билистилэр. Күүс-көмө буоларга үлэ хайдах барыан сөбүн сүбэлэстилэр. Инники үлэ ситиһиилээхтик барарыгар Алгыстарын анаатылар.
Үлэ РФ Президенэ Владимир Путин быһаччы дьаһалынан, нэһилиэнньэни социальнай гаастааһын бырагыраама чэрчитинэн ыытыллара кэрэхсэбиллээх. Быйыл ити хайысханан былаан быһыытанан, 85 ыал холбонуохтааҕыттан, «Үрдэл» эрэ түөлбэҕэ 71 ыал дуогабардаһан олорор. Бу сылга улуус үрдүнэн 128 дуогабар түһэриллэн турар. Ону таһынан, “Сиинэ” НАП, Бэтэринээринэй управление, Гидрометеостанция тэрилтэтэ, «Олоҥхо Кэскилэ», «Кэнчээри», Аһымаҕа «Одуванчик» оҕо уһуйааннара гаас оттукка көһөллөрө былааннанар.
Биирдиилээн ыаллар кэскиллээх бырагыраама баара олох-дьаһах тупсарыгар төһүү күүс буоларын этэллэр. Ирдэнэр быраабыланан тэриллэрин ылынан, оҥостоннор дьиэлэригэр күөх төлөн киириитин күннэтэ күүтэллэр.
Вячеслав Алексеев