От ыйын 10-11 күннэригэр Бэрдьигэстээххэ өрөспүүбүлүкэҕэ күөх төлөн уот сылааһын хааччыйааччы дьон II спартакиадалара үрдүк таһымҥа ыытылынна. Түөрт сылга биирдэ ыытыллар күрэхтэһиигэ “УГРС-1», «УГРС-2», «ЛПУМГ», ИД-АУП-СМУ-СЗ “Магистраль”, «УСД», Ленскэй, Бүлүү бөлөх сүүмэрдэммит хамаандалара спорт уон сэттэ көрүҥэр күөн көрүстүлэр.
Күрэхтэһии кыттыылаахтарын «Сахатранснефтегаз» АУо генеральнай дириэктэрэ Алексей Колодезников, улуус салалтата ситиһиилэри баҕаран туран, бэйэлэрин эҕэрдэлэрин тириэртилэр.
Тустаах тэрилтэ үлэһиттэрэ кырдьык да үлэни, спорду өрө туппут дьон буолаллар. Спорт маассабай көрүҥнэригэр эрэ буолбакка, бары көрүҥнэргэ олус сытыы киирсиилэри көрдөрбүттэрин бэлиэтиир наадалаах. Күүтүллүбүтүн курдук волейболга, футболга спортсменнар үчүгэй оонньуулары бэлэхтээтилэр. Биир идэлээхтэрин иннигэр күөртүүр ыһыы-хаһыы биир кэм ньиргийэн турда. Мас тардыһыыта, хапсаҕай, «Эр бэрдэ» дэгит күрэс, хабылык-хаамыска тыҥааһыннаахтык барбыта спорт национальнай көрүҥнэрэ киэҥник биһирэнэрин бигэргэттэ.
Бэрдьигэстээххэ баар гаас үлэһиттэрэ «УГРС-1», «УГРС-2», «УСД» аатын чиэстээхтик көмүскээтилэр. Ол курдук, футболга Авксентий Филиппов, Степан Колесов, Герасим Семенов, төрүт оҕунан ытыыга Варвара Алексеева бастакы, чэпчэки атлетика эстафетатыгар Алина Яковлева иккис, Авксентий Филиппов үһүс, кибер-спорка Ньургун Николаев, хабылык-хаамыска Күн Дьөһөгөй Үрдүк Өрөгөй Өрө көр, баскетболга (3х3) Платон Григорьев үһүс миэстэни ылан, хамаандаларыгар наадалаах очукуолары биэрбиттэрин, үрдүктүк сыаналаатылар.
Ону таһынан, Горнайдааҕы эксплуатационнай учаастак (начаалынньык Юрий Алексеев) үлэһиттэрэ, спорт хайысхатыгар үлэлиир салайааччылар, тренердэр спартакиада ситиһиилээхтик, сиэрдээхтик ыытылларыгар күүс-көмө буоланнар, тэрийээччилэр махталларын ыллылар.
Вячеслав Алексеев.
Хартыскалар «Сахатранснефтегаз» АУо сайтыттан туһанылыннылар.