Бүгүн Улуу Кыайыы күнүн көрсө, Бэрдьигэстээххэ “ДьУоКХ” филиалын дьиэтин иннигэр Ийэ дойду көмүскэллээх, бигэ туруктаах буоларын туһугар СВО-ҕа бэйэтин баҕа өттүнэн баран, ытык иэһин толоро сылдьан, олоҕун толук уурбут, “Хорсунун иһин” уонна “Байыаннай килбиэнин иһин” II истиэпэннэрдээх мэтээллэринэн наҕараадаламмыт Руслан Павлов сырдык аатын үйэтитэр мемориальнай өйдөбүнньүк арыллыыта буолла.
Хорсун буойун 1999 сылтан 2022 с. СВО-ҕа барыар диэри үтүө суобастаахтык үлэлээбитэ. Кини бары үлэҕэ сыстаҕас, туохтан да иҥнэн турбат, сатаабатаҕа суох эр бэрдэ этэ диэн, бииргэ үлэлээбит уолаттара ахталлар. Кырдьык да оннук, Руслан Павлович улууспут бары нэһилиэктэригэр, дьон олорор усулуобуйата тупсарыгар бэйэтин сыратын уурбутун күн бүгүҥҥэ диэри умнубаттар.
Сэлиэнньэ иһигэр ититии ситимэ хаачыстыбалаахтык тардыллан, ыалларга тиийэригэр, хочуолунайдар быыстала суох үлэлииллэригэр, бэйэтин кылаатын киллэрсибит эппиэтинэстээх дьоһун үлэһит киһи этэ диэтэхпинэ сыыспатым буолуо. Дэлэҕэ даҕаны, “Көмүс илиилээх сыбаарсык этэ” диэн ахта-саныы сылдьаллыахтара дуо.
Бэлиэ тэрээһиҥҥэ Руслан Павлович тапталлаах ийэтэ Анна Андреевна, кэргэнэ Варвара Романовна ахтар-саныыр, күндү киһилэрин аатын үйэтитэргэ, кыһамньылаах үлэни ыыппыт дьоҥҥо долгуйан туран, итии-истиҥ махталларын тириэртилэр. Улуус, Бэрдьигэстээх салалтатын, байыаннай комиссариат үлэһиттэрин, “Боевое братство” уолаттарын кытары, уһун кэм устата бииргэ алтыһан үлэлээбит киһилэрин туһунан “ДьУоКХ” филиалын дириэктэрэ Семен Колесов, урукку сыыларга тэрилтэни салайбыт Владимир Васильев, профком бэрэссэдээтэлэ Дьулустаан Антонов, саахалы туоратар-сөргүтэр биригээдэ аатыттын Артур Андреев үтүө үлэһит уолларын туһунан истиҥник кэпсээтилэр.
Киһи бэрдэ, бастыҥ үлэһит, хорсун буойун, төрөөбүт дойдутун дьиҥнээх патриота Руслан Павлов сырдык аата ааттана турарыгар СӨ «ДьУоКХ» ГУП салалтата, профкома дириҥ өйдөбүллээх, үйэлээх үлэни ыыппыта махталлаах дьыала диэн бэлиэтиэх тустаахпыт. Ийэ дойду көмүскэлигэр сылдьар, олохторун толук уурбут саллааттарбытынан киэн туттабыт, холобур оҥостобут.
Вячеслав Алексеев