Бүгүн улуус баһылыгын 2025 сыллааҕы отчуота Атамайга, Октябрьскайга түмүктэннэ. Отчуоту улуус баһылыга Никита Андреев сүрүннээн ыытта. Үүммүт саҥа сылынан эҕэрдэлээтэ, ааспыт сыл ситиһиитин түстэспит тыа сирин туруу үлэһит дьонугар махталын биллэрдэ.
Ону тэҥэ көрсүһүүгэ Ил Түмэн депутата Алквиад Тарасов, улуус баһылыгын бастакы солбуйааччыта Сардаана Стручкова, улуус баһылыгын солбуйааччыта Николай Дьяконов, киин балыыһа кылаабынай бырааһа Егор Григорьев, «Горнай Ас» ТХПК бэрэссэдээтэлэ Николай Ефремов, сиргэ, баайга-дуолга сыһыаннаһыы управление салайааччыта Василий Аргунов, тыа хаһаайыстыбатын управлениетын начаалынньыга Роман Филиппов, үөрэх управлениетын начаалынньыгын солбуйааччы Ия Заровняева кыттыыны ыллылар, олохтоохтор ыйытыктарыгар туһааннаах хоруйдары биэрдилэр.
Икки нэһилиэккэ үүт харчытын боппуруоһа сытыытык турда. Медицина эйгэтигэр тохтоон ыллылар, чуолаан оҕо стоматолога тиийбэтин ыйдылар.
АТАМАЙГА
Урбаанньыт Илья Осипов мүөттээх ыҥырыа иитиитин кэҥэтэр былааннааҕын эттэ. «Уһук Илиҥҥи гектаар» бырагыраама чэрчитинэн сир ылбыт. Онно киириигэ 5 км суол наасыбын оҥоруу өҥөтүн туоһуласта.
СВО кыттыылааҕа Александр Федоров Аһыма – Күөрэлээх айанын суола көстүүтэ мөлтөҕүн ыйда. Доруобуйатынан хааччахтаах киһи балыыһа иннигэр массыынанан киирии өҥөтө баар буоларыгар этиилээх. Айан суолугар суол бэлиэтэ аҕыйаҕын ыйда.
Сардаана Софронеева гаас киллэриитигэр субсидияҕа квотата аҕыйаҕын, анализ туттарыыга бириэмэтэ кылгаһын бэлиэтиир, эбиэт кэнниттэн төлөбүрдээх өҥөлөр оҥоһулларыгар этии киллэрдэ.
Саргылаана Ефремова чэпчэтиилээх эмкэ-томпко, чуолаан сахарнай диабеттаахтарга тоҕо хойутуурун ыйытта.
Кирилл Иванов саҥа водоскважина киириитигэр суолун оҥоруу өҥөтүн туоһуласта.
«Радуга» оҕо уһуйаанын сэбиэдиссэйэ Диана Федорова уһуйаан инники сылларга «Горнай Ас» бородууксуйатынан үрүҥ аһынан хааччыллан олорбута, билигин таһыы өҥөтө кыаттарбакка тохтообутун эттэ. Салгыы үлэ ыытыллыа дуо диэн ыйытта.
Диана Жиркова «Горнай Ас» үлэтин үчүгэйинэн сыаналыырын иһитиннэрдэ. Одунуга баар айрширскай сүөһү төһө барыстааҕын туоһуласта. Ону тэҥэ медицинскэй (санитарнай) книжканы улууспутугар биэрэллэригэр этиилээх.
Нина Сутакова