Атырдьах ыйын 19 күнүгэр “Сардаҥа” түөлбэ салайааччыта Любовь Мордовская уонна олохтоохтор көҕүлээһиннэринэн оҕолорго “лапта” оонньуутугар күрэхтэһии буолла.
Урукку көлүөнэ оҕолоро бу оонньууну бэркэ өйдүүр буолуохтаахтар. Сайыҥҥы кэмҥэ дуоһуйа сүүрэн-көтөн, мэниктээн, күнү-дьылы биллибэккэ аһардарбыт. Оонньууга бары түөлбэлэртэн 48 оҕо кэлэн, бэйэлэригэр саҥа көрүҥү арыйан, билэн-көрөн, астына күрэхтэстилэр. Оонньуу быраабылатын Василий Яковлев билиһиннэрэн, иилээн-саҕалаан ыытта.
– Урут оҕо сырыттахха наһаа үчүгэй буолара. Оҕолор сайыҥҥы сынньалаҥнарын туһалаахтык атааралларын туһугар күрэхтэһиини тэрийдибит. Олус элбэх оҕо кыттан, сүргэбит көтөҕүлүннэ. Күрэхтэһии ыытарбытыгар Ил Дархан Айсен Николаев “Сынньалаҥ спордун миэстэтэ” диэн Гранын ылбыппыт улахан тирэх буолла. Онон махталбыт муҥура суох, – диэн Любовь Иевна бэйэтин санаатын үллэһиннэ.
Барыта алта хамаанда оонньообутуттан кыайыылаах үрдүк аатын «Харысхал» ылла. Иккис миэстэҕэ «Горнайдар» таҕыстылар. Үсүһү «Харысхан» ылла.
Тэрийээччилэр оҕолорго анаан, дэлэй астаах сандалыны тэрийэн, оҕолорго биир умнуллубат түгэни бэлэхтээтилэр.
“Сардаҥа” түөлбэ улууспутугар биир бастыҥ үлэлээҕинэн биллибитэ балачча кэм буолла. Түөлбэ олохтоохторо бары олус көхтөөхтөрүн билэбит. Бэйэлэрин күүстэринэн оҕолорго анаан спортивнай былаһаакка оҥороннор, улууспутугар кэмиэрчэскэйэ суох тэрилтэлэр үлэлэрин биир бастакынан саҕалаабыттара диэтэхпинэ үгүстэр сөбүлэһиэхтэрэ.
Билигин даҕаны түөлбэ үлэтигэр былаан элбэх. Олох хаамыытын кытары тэҥҥэ барсаллар. Сылтан сыл былаһааккаларыгар тупсарыы үлэтин ыыталлара кэрэхсэбиллээх. Сүүрэр суол оҥортороннор оҕолор эрэ буолбакка, улахан дьон кытары кэлэн, доруобуйаларын чэбдигирдэн хаамаллар-сиимэллэр. Ону таһынан, кэрэ көстүүлээх буоларыгар болҕомто уураннар, сибэккини дэлэйдик олордоллор. Уотунан-күөһүнэн киэргэтэн, дьону-сэргэни үөрдэллэр.
Бу кэмҥэ олбуордарын ситэрэргэ үлэлии сылдьалларын сэргии көрдүм.
Вячеслав Алексеев