Сэтинньи 17 күнүгэр Мэхээлэ Дьөгүөрэп аатынан Сынньалаҥ киинэ «PROFFI-2023» диэн күрэс идэлээх эдэр ыччаттары түмтэ. Күөрэлээхтэн, Аһыматтан уонна Бэрдьигэстээхтэн идэлээх эдэр дьон түмсэн, барыта 6 хамаанда кытынна. Биhиги нэhилиэкпититтэн 2 хамаанда ситиhиилээхтик кытынна. Ол курдук, “Эрчим” нэһилиэк эдэр исписэлиистэрин хамаандата (сал. Айтал Винокуров) уонна “Туйгун” эдэр учууталларын хамаандата (сал. Лукерья Платонова). Бары хамаандалар бэрт үчүгэйдик бэлэмнэнэн кэлэн илин-кэлин түстүлэр, сонун дьоро киэһэни көрөөччүлэргэ бэлэх ууннулар. Бииртэн биир бэйэ-бэйэлэригэр майгыннаспат суоллаах-иистээх эдэр дьон түмсэн “Талан ылбыт идэм – чахчы миэнэ” диэн толору дакаастаатылар.
Биһиги оскуолабыт хамаандата ааттыын “Туйгун”, дьэ кырдьык туйгуннук дьон болҕомтотун тардар гына олус бэркэ кытынна. Бары саҥа үлэлиир ыччаттар бэйэлэрэ ааттаах-суоллаах, идэлэригэр ылсан туран олус бэриниилээхтик, умсугуйан туран үлэлииллэрэ тута харахха быраҕыллар. Хамаанда кыттааччылара: хотугу многоборьеҕа спорт маастара, физкультура уонна ОБЖ учуутала – Василий Ефремов. Оскуола профсоюһун салайааччыта, алын кылаас учуутала – Саргылаана Кузьмина. Улуустааҕы “Деловой учитель” профессиональнай күрэх 1 степеннээх Дипломана, дириэктэри үөрэх чааһыгар солбуйааччы, саха тылын, литэратуратын уонна омук тылын учуутала – Анастасия Слепцова. Учууталларга аналлаах «Абака» улуустааҕы физико-математическай күрэх 2 төгүллээх кыайыылааҕа, математика учуутала – Лилия Дьяконова. Уонна “Сыл бастыҥ учуутала” улуустааҕы күрэх кыайыылааҕа, алын кылаас учуутала – Лукерья Платонова.
Биһиги ыччаттарбыт дэгиттэр талааннарынан ыллаан, үҥкүүлээн, гитараҕа оонньоон, публикаҕа сатаан бэйэлэрин олус үчүгэйдик көрдөрөн, этэргэ дылы “Таҥара табатыныы таҥнан-симэнэн, хааман-сиимэн” үөртүлэр. Этэн-тыынан итэҕэтэн түмсүүлээхтэрин, үлэлэригэр бэриниилээхтэрин толору арыйдылар, дьон кутун-сүрүн туттулар. I миэстэ Сэмэн Данилов аатынан Бэрдьигэстээх орто оскуолатын учууталларын уонна уһуйаан “Сардаана” иитээччилэрин “Ситим” хамаанда, II – Кировскай орто оскуолатын учууталларын “Туйгун” хамаандата, III – Эбии үөрэхтээһин киинин уһуйааччылара (“Вектор”). Ону тэҥэ хамаандаларга номинациялар ананнылар. Күрэһи Сынньалаҥ киинин режиссера Варвара Саввина саҥран-иҥэрэн сэргэхтик ыытта.
«Санаа холбостоҕуна, сүбэ түмүлүннэҕинэ кыайтарбатах кыайыллааччы!» диэн санаанан салайтаран, айымньылаахтык үлэлиир эдэр учууталлар түмсүүлэрэ «Туйгун» дьэ кырдьык туйгун!
Түмүктээн эттэххэ, «PROFFI» күрэс кыттааччыларга үүнэргэ-сайдарга төһүү буоларын бэлиэтиир тоҕоостоох. Киһи киһиттэн үөрэнэр, саҥа санаа саҕыллар, хаһан баҕарар үчүгэйгэ, үтүөҕэ кыттыы эдэрдэри үрдүккэ кынаттыырыгар саарбахтаабаккын!
Галина Капитонова, Саха Өрөспүүбүлүкэтин үөрэҕириитин туйгуна