Бүгүн П.Д.Аввакумов аатынан киин библиотекаҕа Поэзия Аан дойдутааҕы күнүн көрсө эдэр поэт, «Дьүрүскэн» литературнай түмсүү кыттыылааҕа, общественнай корреспондеммыт Мария Андреева Россия Суруйааччыларын сойууһун чилиэнигэр киирбит үөрүүтүн үллэстэр дьоро тэрээһинэ ыытылынна.
Поэзия истиҥ түһүлгэтигэр улуус баһылыга Никита Андреев, Одуну нэһилиэгин баһылыга Владимир Текеянов, Дьокуускайтан маанылаах ыалдьыттар саха народнай поэта, Саха сирин Суруйааччыларын сойууһун бырабылыанньатын бэрэссэдээтэлин солбуйааччы Наталья Харлампьева, поэт, публицист, Саха сирин Суруйааччыларын бырабылыанньатын сойууһун бэрэссэдээтэлэ Гаврил Андросов , поэтессалар Зинаида Архипова, Яна Байгожаева, Саха сирин эдэр литератордарын Сэбиэтиттэн, «АйАрт» айар түмсүүттэн, биир дойдулаахтара, олохтоох «Үлэ күүһэ» редакцияттан, улуустааҕы «Сыккыс», «Дьүрүскэн» литературнай түмсүүттэн, бииргэ үлэлиир кэллиэгэлэрэ, аймах-билэ дьонноро уо.д.а кыттыыны ыллылар, үөрүүтүн үллэһиннилэр.
Сырдык күҥҥэ үтүө тыл мааныта этилиннэ, баҕа санаа үтүмэнэ түстэннэ.
Кэрэ эйгэҕэ эдэр поэт ыллыктаах хоһооннорун аахтылар, ылбаҕай ырыалара ылланнылар. Хаһыаппыт истиҥ доҕорун Мария Андрееваны Россия суруйааччыларын сойууһугар киирииҥ – айар үлэҥ өссө биир кэрдиис кэминэн, чаҕылхай Чыпчаалынан буоллун. Дириҥ байҕал курдук, уһата-туората көстүбэт айар үлэ умсулҕанын хоту эрэллээхтик хардыылаа, саҥаны ай-тут, бар дьон сэҥээриитин ыла тур!
Нина Сутакова
Елена Дьячковская хаартыскаҕа түһэриилэрэ