Бу күннэргэ Дьокуускайга «Сааскы таммахтар» диэн фольклорга оскуола оҕолоругар өрөспүүбүлүкэтээҕи куоҥкурус буолла.
Аан бастакытын ыытыллар күрэскэ С.П.Данилов аатынан Бэрдьигэстээх орто оскуолатын «Тэтим» фольклор бөлөҕө I степеннээх Лауреат, Гран-при буоллулар. Салайааччылара саха аатырбыт этно — музыканнара, СӨ народнай артыыстара Клавдия, Герман Хатылаевтар «Бастыҥ салайааччы» Дипломунан наҕараадаланнылар.
Түгэнинэн туһанан, оҕолорго бу сааскы сынньаҥнарыгар түбэһиннэрэн анаан тэрийбит, киэҥ хабааннаах түһүлгэни олохтообут, Култуура министиэристибэтигэр, «Юные якутяне» уонна «Арт Glob Nor Star» киин салайааччыларыгар, Дьокуускайга иилээн-саҕалаан илдьэ сылдьыбыт кылаас салайааччытыгар Марианна Николаеваҕа төрөппүттэр улахан махталларын биллэрэллэр.
Санатар буоллахха, бу «Тэтим» фольклор бөлөҕө оҕо духуобунай өттүнэн сайдарыгар, төрүт сыаннаспытын фольклору сайыннарыыга туһуламмыт бырайыак былырыыҥҥаттан үлэтин тэтимнээхтик саҕалаата.
Оҕолор айар суолларын ыйар, талааннарын, дьоҕурдарын, кынаттыыр кэскиллээх хамсааһыннар кэҥээн, сайдан, тэнийэн истиннэр. Ситиһиилээх оҕолорбутун уонна кинилэр салайааччыларын итиитик-истиҥник эҕэрдэлиибит.
Нина Сутакова