Турслекка кыттар оҕо бастыҥ спортсмен, ориентировщик, геолог, топограф, кыраайы үөрэтээччи, бастыҥ сигнальщик, санитар, повар, быһата кини барытыгар дэгиттэр диэн хаһыаппыт общественнай корреспондена, кыраайы чинчийээччи Владимир Парфенов быйылгы хаһыат 29 нүөмэригэр суруйан турар. Чахчы, оннук! Турслет бастыҥтан бастыҥ, чаҕылхай оҕолору түмэр биир ураты уонна оҕолорго күүтүүлээх тэрээһин буолар.
Ол курдук, балаҕан ыйын 24 күнүгэр кэрэ, мааны пааркабыт территориятыгар «Горная тропа-2026» турслет улуус оскуолаларын бастыҥ үөрэнээччилэрин бииргэ түмтэ.
Саас буолбут турслекка 3 эрэ оскуола кыттыбыт буоллаҕына, бу сырыыга улуус оскуолата барыта кэлбитэ үөрүүлээх!
Халлааммыт анаабыт курдук туран биэрдэ. Турслет түөрт түһүмэҕинэн биир тыынынан буолла. Кыттааччылар бу түһүмэхтэргэ кыахтарын тургутан көрдүлэр, саҥаны-сонуну биллилэр. Оҕолор ордук быаны баайыыга ыарырҕаталлар эбит. Уопсайа 14 көрүҥ баар эбит, манна сөкүүндэҕэ сорудаҕынан ханнык көрүҥ түбэспитинэн быаларын баайа охсуохтаахтара ирдэнэр. Оҕолор бары кыһаллан бэлэмнэммиттэрэ тута көстөр. Иккис түһүмэххэ, оҕолорго карта уонна компас көмөтүнэн паарка территориятыгар контрольнай пууннары (КП) булар сорудаҕы толордулар.
Онтон мэһэйдэри туоруур түһүмэххэ хамаанданан рюкзагы хомунууга, палатка туруорууга о.д.а күрэхтэстилэр. Төрдүс түһүмэххэ, «Оскуолабытыгар туризмы төрүттээччилэр» диэн рапорт-альбом көмүскээһинэ буолла.
Бу курдук күһүҥҥү турслекка оскуола барыта бэлэмнэнэн, туризмы пропагандалаан, көҕүлээн кыттыбыттара кэрэхсэбиллээх. Онон күһүҥҥү турслет сылын аайы маннык тэрээһиннээхтик, үгүс оҕону, бары оскуоланы хабан ыытылларыгар олук уурда.
Турслет оҕону элбэххэ үөрэтэр, бу күн оҕолор уоттаммыт харахтарынан көрдөххө, бары да олус биһирээтилэр, тэрээһин биир тыынынан буолла, үөрэнээччилэр араас күрэхтэргэ кыахтарын тургутан көрдүлэр, саҥаны-сонуну биллилэр, бэйэ-бэйэлэрин кытта доҕордостулар.
Бу күрэхтэһиигэ кыайбыт уонна миэстэлэспит хамаандалар Бочуотунай Грамотанан уонна мэтээлинэн наҕараадаланнылар.
Кыайыылаах буолбут хамаандалары: 1 миэстэ- С.И.Тарасов аатынан Өрт оскуолатын, 2 м — С.П.Данилов аатынан Бэрдьигэстээх оскуолатын, 3 м — А.Н.Осипов аатынан Бэрдьигэстээх оскуолатын хамаандаларын, учууталларын, төрөппүттэрин эҕэрдэлиибит. Кыайыылаах буолбут Солоҕон хамаандата 2027 с. «Спортивные якутяне» өрөспүүбүлүкэтээҕи үөрэнээччилэр спартакиадаларыгар, спортивнай ориентированияҕа улууспут аатын көмүскүүр чиэскэ тигистилэр. Эҕэрдэлиибит уонна ситиһиилэри баҕарабыт!
Күннэй Алексеева,
Алаайа Андреева хаартыскаҕа түһэриилэрэ.