Саха автономнай өрөспүүбүлүкэтин Үрдүкү Сэбиэтин уурааҕынан, 1940 сыллаахха алтынньы 26 күнүгэр Бэрдьигэстээх нэһилиэгин Сэбиэтэ тэриллибит.
Бу историческай датаны бэлиэтээн, араас хабааннаах тэрээһиннэри ыыттыбыт.
Нэһилиэк историятын сырдатар, төрөөбүт дойдуга тапталы күүһүрдэр сыаллаах 8 уонна 10 кылаас оҕолоругар кылаас чааһа ыытылынна. Нэһилиэк тэрилтэлэрин салайааччылара: Мэхээлэ Дьөгүөрэп аатынан сынньалаҥ киин директора Алексей Оконешников, ЖКС директора Анатолий Лю-фа, М.Е.Тимофеев аатынан кыраайы үөрэтэр түмэл үлэһитэ Мария Борисова В.В.Филиппов аатынан улуустааҕы гимназия оҕолорун кытта көрүстүлэр. Онтон нэһилиэк сэбиэтин депутаттара Михаил Оленов, Семен Саввин, Вероника Сергеева, Василий Яковлев, Дмитрий Иванов, Вахид Гадимов С.П.Данилов аатынан оскуолаҕа сырыттылар.
Уопсайа аҕыс кылаас хабылынна.
Нэһилиэк баһылыга Алексей Аргунов В.В.Филиппов аатынан улуустааҕы гимназияҕа куратордыыр кылааһа – 8 кылаас оҕолоро хас да бөлөххө хайдыһан, урукку кэмҥэ нэһилиэги салайан олорбут уонна баһылыгы солбуйааччынан үлэлээбит дьонтон видеонан интервью ыллылар. Нэһилиэк сэбиэтин 14 сыл салайбыт, билигин 101 сааһын туолбут Тарасова Мария Григорьевна – Сэбиэт Маарыйа, баһылыктаабыт Кривошапкин Альберт Никитич, солбуйааччынан үлэлээбит Пахомов Юрий Степанович, Филиппова Айталина Ильинична бэйэлэрин кэмнэрин ахтан-санаан аастылар. Эдэр көлүөнэ оҕолоро кинилэргэ интэриэһиргиир ыйытыыларын биэрэн, уруккуну уонна билиҥҥини ситимниир кэпсэтии таҕыста.
Маны таһынан, кыраайы үөрэтэр түмэл нэһилиэнньэҕэ анаан интернет ситимин нөҥүө «Мин Бэрдьигэстээҕим» диэн таайбараҥ тарҕатта. Мэхээлэ Дьөгүөрэп аатынан сынньалаҥ киинин үлэһитэ Варвара Саввина, видеограф Роман Дмитриев матырыйаалыттан таҥан, талааннаах ыччаппыт Кустуктаан Семенов ырыатыгар бар дьоммутугар дойдубутун сырдатар видео бэлэх уунна.
Бэлиэ күн сүрүн тэрээһининэн – «Ыччат 2050» диэн форсайт-сессия буолла. «Сэргэх сэлиэнньэ» диэн тэрилтэлэр ыччаттарын икки ардыларыгар ыытыллар сыллааҕы күрэхтэһии чэрчитинэн ыытылынна.
Манна 4 хамаанда мустан, нэһилиэк сайдыытын туһунан сонун идеялары этиннилэр, кылгас кэмҥэ бырайыак толкуйдаан көмүскээтилэр. Биһиги ыччаттарбыт көхтөөхтөрүттэн, бэйэлэрин санааларын аһаҕастык этинэллэриттэн, уратылаах уонна дириҥ ис хоһоонноох идеяларыттан олус астынныбыт. Кинилэр нэһилиэкпит инники кэскилин түстүүр дьоҕурдарын уонна дьулуурдарын ырылыччы көрдөрдүлэр.
Тапталлаах дойдубут Бэрдьигэстээх үүнэ-сайда, чэчирии тур!
Ксения Васильева.