Бэрдьигэстээх олохтоохторо уу ыраастыыр станция арылларын долгуйа күүтэллэр. Бу саҥа улахан объект «Ыраас уу» федеральнай бырайыагын хайысхатынан үлэлиэҕэ.
Объект хаһааҥҥыттан үлэлиирин туһунан, ааҕааччыларбытыгар улуус баһылыгын солбуйааччыта Алгыс Стручков маннык сырдатта:
— Сайын устата бэлэмнэнии үлэтин ыыттыбыт. Бүгүҥҥү күҥҥэ манна кэтээн көрүү быһыытынан ууну ыытан саҕалаата. Билигин тустаах тэрилтэлэргэ докумуоннары туттаран, ыраастаммыт уубутун анализтатан, бэрэбиэркэлэтэн, Роспотребнадзортан көҥүл ылыахтаахпыт.
Бу сайын объегы эксплуатациялыыр тэрилтэни быһаарар куоҥкурус биллэриллэн, «Дельта» ХЭТ кыайан, дуогабардаһан олоробут. Докумуон үлэтэ ситтэҕинэ, быйыл 38 кыбаартал олохтоохторо уунан толору хааччыллыахтара. Нэһилиэнньэҕэ тариф хас буоларын Госкомцен бигэргэтэрин күүтэбит, барыллаан суоттааһынынан, 1 куб — 700 солк. тахсыспыта.
Бэлэмнэнии үлэтин иккис этаабынан, муниципальнай бырайыакпыт олоххо киириэхтээх. Ол курдук, Эбэ түөлбэни ыраас уунан хааччыйыахтаахпыт. Манна үлэни ыытар тэрилтэ, билиҥҥи туругунан Дьячковская уулуссаҕа насос станцията турар миэстэтин бэлэмнии сылдьар, турбалар, утепления матырыйааллара быйыл кэлиэхтээхтэр. Онон, бу түөлбэҕэ кэлэр сылга ыраас уу дьиэлэригэр тиийиэҕэ. Билиҥҥитэ, 22 ыал дуогабар түһэристэ, олортон 3 ыал харчынан кыттыста. Бырайыак быстыбахха үлэлииригэр, Эбэ түөлбэ олохтоохторо бука бары дуогабардаһан, үбүлээһиҥҥэ кыттыһан, үлэни тэтимирдиэҕиҥ.
Санатар буоллахха, тобох, кирдээх ууну ыраастыыр станцияҕа (КОС) быйыл модернизация үлэтэ ыытылынна. Газовай хочуолунай тутуллан, газ ситимэ объекка тириэрдиллэн турар. Куоҥкуруһунан эксплуатациялааһыҥҥа эмиэ, «Дельта» ХЭТ ылыста. Онон, модернизация үлэтэ түмүктэннэ, сотору кэминэн тариф бигэргэнэн, үлэтин бу сылга саҕалыаҕа.
Бу курдук, «Ыраас уу» бырайыак олоххо киирэн, нэһилиэнньэ олоҕо-дьаһаҕа тупсарыгар төһүү күүс буолуоҕа.
«Үлэ күүһэ».