Бүгүн Бэс Күөлүгэр «Хаарбах туруктаах дьиэттэн көһөрүү» диэн федеральнай бырагыраама чэрчитинэн 13 кыбартыыралаах саҥа дьиэ тутуутун бастакы сыбаайата сахалыы сиэринэн-туомунан арыалланан түстэ.
Үөрүүлээх күҥҥэ улуус баһылыгын солбуйааччы Николай Дьяконов, «Томтор» ХЭТ генеральнай дириэктэрэ Петр Архипов уонна нэһилиэк баһылыга Айсен Павлов кыттыыны ыллылар.
Бу баараҕай тутууну «Томтор» ХЭТ ыытыаҕа. Ол курдук нэһилиэккэ бу бырагырааманан 28 киһи саҥа квартиранан хааччыллара былааннанар.
Икки этээстээх МХМ матырыйаалынан тутуллар, толору уунан, күөх уотунан хааччыллар, оҕо оонньуур былаһааккалаах уонна массыына турар анал парковкалаах тутуу кэлэр сыл төрдүс кыбаарталыгар түмүктэниэ.
Нэһилиэнньэ олорор усулуобуйатын тупсарарга туһуламмыт кэскиллээх бырагыраама олоххо киириитэ инники сайдар кэскилбит бигэ тирэҕэ буолара саарбахтаммат.
Нина Сутакова
